Tripura-ah khaw lum vangin ni thum chhung sikul chawlh puang

Tripura sorkar chuan an state chhungah khaw lum nasa (heatwave) avangin nimin aṭanga naktuk thleng awh turin sikul chawlh a puang. Sorkar thuchhuah hian sorkar sikul bakah private sikul thlengin a huam tel a ni.

Tripura-ah hian khaw lum vangin kar hmasa Thawhlehni, April 23 khan sikul chawlh hi puan a lo ni tawh a, hemi chhunzawmna atan hian education department hian thuchhuah hi a siam thar leh a ni. Tripura education department chuan,"Education (School) Department hnuaia Government leh Government-Aided Schools, TTAADC hnuaia sikul leh private sikul te chu ni thum chhung, April 29 - May 1, 2024 thleng khar leh a ni ang. District Education officer zawng zawng chu an huam chhungah he thupek hi kengkawh tura hriattir an ni e" tiin an tarlang.

India Meteorological Department (IMD), Agartala chuan Thawhṭanni aṭanga Nilaini thleng hian Tripura state chhungah khua a lum dawn hle niin a sawi lawk a, hemi avang hian sorkar pawhin sikul chawlh hi a puang a ni. Pathianni khan state chhunga khaw lum zawng chu 37 degree celsius niin, an state tan chuan hei hi a sang hle a ni.

Meghalaya-ah khaw lum vangin sikul kai hun tidanglam

Meghalaya-a West Garo Hills district thuneitute chuan district chhunga sikul naupangte chuan khaw lum nasa tak an tawrh loh nan sikul kai hun an tidanglam a, May 1 aṭanga kalpui ṭan tur a nih thu an sawi bawk. Sikul tinten tui in tur hnianghnar takin zirlaite tan chhawp chhuak tura tih an nih bakah, hydration solution kawl tur tia thuchhuah siam a ni bawk.

District thuneitute'n thuchhuah an siamah, Upper primary, secondary leh higher secondary zirlaite tana sikul kai hun hi zing dar 6:30 aṭanga zing dar 10:30 thleng atan sawn a ni. Chawhma dar 11 aṭanga tlai dar 3 thleng class lak loh tur a nih thu puangin, tlai lam leh zan lama sikul kai ṭhinte erawh an sikul kai dan panngaia kal tura tih an ni.

Zirlai naupangte chu nimin aṭanga naktuk thleng awh turin zing dar 6:30-ah sikul kai ṭanin, chhun khaw lum an tawrh loh nan zing dar 10:30-a sikul bang tura tih an ni a, hemi hun chhung baka sikul kai hun tidanglam duh an awm a nih chuan sikul thuneitute kuta dah a nih thu tarlan a ni. Nursery leh lower primary zirlaite chu vawiin leh naktuk chawl tura tih an ni bawk. Meghalaya sorkar chuan khaw lum nasa tak zirlai naupangte'n an tawrh loh nan sport leh outdoor activities huaihawt lo turin state chhunga school zawng zawngte chu a lo hriattir tawh bawk.