Vanglaini - Pungkhawm loa Zirtirtute Ni hman rêl

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Pungkhawm loa Zirtirtute Ni hman rêl

School Education minister Lalchhandama Ralte hoin nimin khan Secretariat conference hall-ah September 5, 2020-a Zirtirtute Ni hman dan tur rel a ni a; Covid-19 léng vanga sikul kal theih a nih loh avangin naupangte nen puipunna siam loa hman ni se, an ti.

Lalchhandama Ralte chuan, Teachers' Day chu ram pum huapa ni pawimawh, ram hruaitute'n thuchah an sawi ṭhinna a nih thu sawiin, "Kuminah chuan sikul kal theih loh a nih avangin kum dang anga hman theih a ni dawn lo hi a pawi hle. A theih chin chinah zirtirtute zahna leh chawimawina lantir a ṭha. Kum dang anga he ní hman theih loh hi Pathian remruatah ngaiin, kum dangah an phû ang ngeiin ropui zawkin kan la hmang leh thei ngei ang tih beisei ang u," a ti.

Meeting-ah hian, kum danga tih ṭhin angin Teachers' Day pualin Chief Minister leh School Education Minister-te chibai bûkna thu chanchinbuah chhuah a, Education Minister-in thuchah sawiin, TV-ah leh All India Radio leh FM channel-ah te puan chhuah ni se, an ti. District tina khawpui lian zualah uar zawkin banner târ leh zirtirtu natna khirhkhân tuarte ṭanpui nan zirtirtute'n thawhlawm thawh an rêl bawk.

Share this Post

Login to comment

No Comments