IMD-in state ṭhenkhat tan red alert a chhuah

India Meteorological Department (IMD) chuan khaw lum nasa zual tak thleng thei avangin, Bihar, Jharkhand, Odisha leh Gangetic West Bengal chhehvel tan red alert a tichhuak.

Bihar, Jharkhand, Odisha leh Gangetic West Bengal tana IMD-in red alert a tihchhuah bakah hian northeast state te leh Tamil Nadu, Telangana leh Gujarat te tan yellow alert a tichhuak bawk. IMD chuan May 1 vel thleng chu red alert an tih hmunahte hian khaw lum nasa zual tak a thleng thei dawn niin an sawi a, hei hian May 2 hnu lam thleng pawh a la awh thei dawn a ni, an ti. IMD hian India rama khaw lum lam chu degree celcius 2-3-a a san chhoh leh tur thu an sawi a, khaw lum tur bakah India ram hmun ṭhenkhatah chuan hemi hun chhung vek hian thli leh ruah nasa tak thawk turin an hrilh lawk bawk.

World Meteorological Department (WMD)-in a chhinchhiah chinah kum 2023 kha khawvel a lum ber hun niin an tarlang a, mahse, kuminah hian khaw lum lai berin nikuma khaw lum lai ber kha a khum turah an ngai a ni.