Vanglaini - VC thlan tura RO-in MNF candidate-te Vote tura mipui ngenna PR a tichhuak

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

VC thlan tura RO-in MNF candidate-te Vote tura mipui ngenna PR a tichhuak

August 27, 2020-a village council inthlan tura Khawzawl-V (Darngawn) VC thlannaa returning officer Lalzuiliana Ralte chu, Khawzawl District Implementation Demand Committee-a secretary ni bawkin VC thlanah MNF party candidate-te vote tura Khawzawl district mipui ngenna a tichhuak niin Congress ṭhalaite chuan an tarlang a; a lakah State Election Commission-in action a lâk ngei an beisei thu an sawi.

Mizoram Pradesh Youth Congress Committee (MPYCC) chuan, Aizawl South-III bialtu MLA Prof. F Lalnunmawia chu Model Code of Conduct bawhchhiaah an puh bawk a; F Lalnunmawia hian nimin zing khan a bial chhunga Phulpui khuaa VC inthlan atana a campaign-naah, Phulpui chu 'Model village' atan a puan thu leh, chu chu Model Code of Conduct bawhchhiatna a nih thu an tarlang.

MPYCC tarlan danin, VC inthlan turah Khawzawl District Implementation Demand Committee chuan Khawzawl district tihpuitlin a nih vanga lawmthu sawi nan MNF candidate-te vote tling tura mipui ngenna press release an tichhuak a; August 12, 2020 (Nilaini) khan Khawzawla chanchinbuah chhuah a ni. Khawzawl DIDC press release-ah chuan DIDC chairman K Lalzika leh secretary Lalzuiliana Ralte ten hming an ziak a; Lalzuiliana Ralte chu Khawzawl-V (Darngawn Veng)-ah returning officer a ni.

Khawzawl DIDC press release-a paragraph hnihnaah chuan, 'Hetianga district puitlinga min hlankai takah chuan lawmthu sawina atan tun ṭum VC General Election lo awm turah hian sorkar tha tichak tur leh Bialtu MLA tha tichak a, district-in hma a lo sawn zel theih nan sorkarna chang mektute candidate-te lo ṭawiawm a, lo puih hi kan tih ve theiha ngaiin, anmahni lo puibawm ṭheuh turin district chhung mipuite kan sawm a ni,' tiin an tarlang.

State Election Commission-in August 2, 2020-a notification a tihchhuaha a lan danin, Khawzawl Darngawn RO atan Lalzuiliana Ralte ruat a ni a; amah hi Govt. Modern MS, Khawzawla Hindi teacher a ni.

MPYCC chuan, India ram chu democracy ram lian ber a nih angin, inthlanna felfai leh thianghlim neih chu a lungphùm innghahna a nih thu sawiin, "Chutih laiin, inthlan buaipuitu berin hetianga sorkar lai party vote tura ngenna a siam mai hi a dik lo hle a, democracy diriam tumna leh suasamna tenawm ber a ni," an ti.

RO Lalzuiliana Ralte chu lang lo lam aṭanga vaubeh a ni em, tih chu zawhna awm thei a nih thu sawiin MPYCC chuan, "Lalzuiliana Ralte hi chhia leh ṭha hriatna pangngai hmang ngam loin MNF sorkar hian a siam ta mai em ni tih kan zawt a ni," an ti a; thuchhuah siamtute chu an thuchhuah sûtna tichhuak leh turin an ngen a, chutianga hmalakna a awm loh chuan dan anga hma la turin an inpeih reng thu an tarlang a ni.

Share this Post

Login to comment

No Comments