Covid-19 vei mi 15 hmuh belh Niminah 13 chhuahtir an ni

August 12, Nilaini leh nimin tlai thleng khan Rapid Antigen Test hmangin Covid-19 hripui vei mi 15 hmuh chhuah a ni a, Zoram Medical College leh Lunglei Civil Hospital laboratory-ahte hripui vei hmuh a ni lo. Mizorama hripui kai hmuh tawh zawng zawng chu mi 663 an ni a; nimin khan mi 13 chu an dam tawh avangin enkawlna hmun aṭangin chhuahtir an ni thung.

Covid-19 vei dam tawh nimina chhuahtir mi 13-te chu Covid Care Centre (CCC), Berawtlang, Aizawla awmte an ni a; civil mi pathum, BSF sipai pasarih, NDRF mi pahnih leh Assam Regiment-a Mizo sipai pakhat an ni. 

Hriat theih chinah nimin tlai dar 6 thleng khan Mizorama Co­vid-19 vei hmuh chhuah tawh 663 zinga mi 519 chu mipa an ni a, mi 124 chu hmeichhia an ni. Hripui vei tawh zinga mi 343 (51.73%) chu chhuahtir an ni tawh a, mi 320 (48.27%) an la chhuak lo. La chhuahtir loh zinga hripui vei tawh lo (negative tawh) mi eng emaw zat an awm.

Nilaini khan Rapid Antigen Test hmangin swab sample Aizawl, Siaha, Champhai, Kolasib (Vairengte), Ser­chhip leh Hnahthialah endik a ni. Champhaiah Covid-19 vei Assam lam mi pakhat, kum 24-a upa hmuh chhuah a ni a, taksaah harsatna a neih loh avangin CCC-ah dah a ni.

August 12, Nilaini chhun leh zana Assam aṭanga Mizorama lut tur lirtheia chuangte Vairengte checkgate-a endiknaah Covid-19 vei mi pasarih hmuh chhuah an ni a, nimin lam khan mi pasarih hmuh chhuah leh a ni bawk. Vairengtea hripui vei hmuh chhuah tharte hi driver leh handyman vek an ni a, taksaa harsatna nei (Covid-19 symptom lang) an awm lo.

Hetih lai hian, ZMC Covid-19 laboratory-a mi 82-te leh LCH laboratory-a mi 25-te swab sample endikah hripui vei hmuh chhuah thar an awm lo.



Share this Post

Login to comment
No Comments