Sikh-te dikna leh zalenna kan humhimsak ang : Canada PM

Canada prime minister, Justin Trudeau chuan an ramchhunga Sikh khawsate dikna chanvo leh zalenna chu an humhimsak reng dawn tih a sawi. Trudeau hian Khalsa day parade, Toronto a hmanpuinaah he thu hi a sawi a ni.

PM Trudeau chuan,"Canada chhunga Sikh nuai riat chuang awmte dikna chanvo leh zalenna humhimsak turin kan awm reng ang a, Sikh laka huatna leh enhranna thleng ṭhin chu kan do let bawk ang" a ti. Canada PM hian Sikh-te chu an sakhua, zalen taka an vawn theih thu hrilhin, hei hi Canadian Charter of Rights and Freedoms hnuaia an dikna chanvo pawimawh tak a nih thu a sawi bawk.

Canadian Sikh, Khalistan hruaitu pawimawh Hardeep Singh Nijjar thihna chungchang erawh Trudeau hian a sawi lang tawh lo thung. Nikum June thlaa thah, Nijjar thihnaah Indian intelligence-te chu inhnamhnawihna nei angah Trudeau hian Parliament-a a sawi avangin India leh Canada inkar pawh a chhiat phah hle a ni. Tun ṭuma a thusawiah erawh hetiang lam hawi zawngin eng thu mah a sawi lo a, India nen nghet lehzual zawka an inzawm theih nan inbiakna an nei mek tih a sawi thung. Trudeau chuan Canadian Sikh-te'n an chawr chhuahna India ram awlsam taka an tlawh theih nan hma an lak thu a sawi a ni.