Vanglaini - Tuialhthei phurtute an kal ngam loh vangin Mizoramin tuialhtheiah harsatna a tâwk Nimin aṭangin tuialhthei phurte an kal leh ṭan

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

Tuialhthei phurtute an kal ngam loh vangin Mizoramin tuialhtheiah harsatna a tâwk Nimin aṭangin tuialhthei phurte an kal leh ṭan

Mizoram Oil Tankers Drivers Association (MOTD) leh Mizoram Tankers Owners Union (MTOU)-te chu sorkar hmalaknaa an lungawi loh avang leh him tâwka an hriat loh avangin hun eng emaw chen tuialhthei phur turin tank lorry-te an kal lo a, hei vang hian Mizoramah tuialhthei a harsa hman hle.

Nimina Vanglaini palaiin a tlawh filling station ṭhenkhatah chuan coupon neite chauh petrol leh diesel an pe tawh lo a, MIZOFED-ah chuan coupon nei pawh department hotute hriatpuina lehkha keng lo chu an pe lo. Aizawl hmun hrang hranga petrol black-a zawrhnaah pawh lei tur a váng tawh hle a, petrol leh diesel zawnga veivâk an tam hle.

MOTD leh MTOU chuan thuchhuah siamin, inhriattirna hmasa awm loin kawng chhia siam a nih avangin Seṭhawn leh Thingdawl inkarah driver leh handyman-te an tàn hnuah Covid-19 avangin khàrkhip zui an nih thu an tarlang a, "Kawng lakah rei tak chhung tihkhawtlai an ni a, ei leh in tur tak ngial pawh nei loin zan li dáwn dah an ni. Hetiang hi thleng nawn tawh lo turin kan duh," an ti.

Tuialhtheiah mipui an hnianghnàr zawkna atan leh Covid-19 lakah an him theihna atan tanker driver leh handyman-te chu Vairengte khaw dáiah a hranpaa RAT hmanga endik hunbi neih an duh thu tarlangin MOTD leh MTOU chuan, "Hmun hla tak tak aṭanga rawn kalte nena awm khawm hi a him tâwkin kan hre lo. Luh hunbi siamsak chungchangah hetiang hian min siamsak se kan ti," an ti a; RAT hmanga endiknaah Standard Operating Procedure zawm ni se an duh thu an sawi.

MOTD leh MTOU chuan, tanker-te tuialhthei phur turin an kal ngam loh reng thu tarlangin, "Vairengte SDO (Civil) leh Vairengte police-te ṭanpuina azarah ruahmana felfai taka min buatsaihsak tâkah chuan, vawiin (nimin) tlai dar 4 aṭang hian oil phurin kan tlan chhunzawm leh dawn a. Mizoram mipuite'n harsatna kan tawhnaah min hriatthiamna kan ngen a ni," an ti.

Hetih lai hian, tuaialhthei phur tank lorry Lailapur-a tangkhang mekte chu nimin khan Vairengte SDO (Civil) ruahmanain bungraw dang phur ho hmain RAT hmanga endik an ni a, Aizawl lam pantir an ni.

Share this Post

Login to comment

No Comments