2nd Runners-up Rebecca Zothanpuii

April 20, 2000-a piang niin, Khawzawl Vengtharah an cheng. A pa V. Lalhmuchhuaka leh a nu C.Lalbiaksiami a ni. Unau pali an ni a, u mipa pahnih leh nau hmeichhe pakhat a nei.

Kum 2019-2020-ah Hrangbana College Miss 1st Runners up a ni a, Miss Chapchar Kut Khawzawl District 2024 a ni mek bawk.

Zonet-in Miss Mizoram thlanna an buatsaih ṭhin hi ṭha a tih thu a sawi a, beauty pageant hmanga hmeichhiate tan platform ṭha tak an siamsak chu a ngaihlu hle tih a sawi. "Pathian chungah ka lawm a, Khawzawl Dist. MJA chungah ka lawm tak zet bawk. Kan district mipuite leh ka tana theihtawp chhuahtute, thurawn ṭha tak tak min pe a, ka mamawh apiang min ngaihtuahsak a, ka tlakchham bik hlauva sum leh pai min petute chungah khan ka lawm em em.

Khawzawl Welfare hruaitute, ka chhungte leh ṭhiante, ka tana tihtak zeta Pathian hnena hriselna leh hlawhtlinna min dilsak ṭhintu, kan district mipuite leh hmun hrang hranga min hmangaihtu leh min ṭantute hnenah thinlung takin lawmthu ka sawi bawk. Nangmahni aṭang hian midangte tana inpekna pawimawhzia, hlutzia leh ṭangkaizia min hmuh chiantirin, ka damchhunga ka tana zirlai pawimawh ber min zirtirtu leh kawhhmuhtu a ni reng tawh dawn a ni," tiin lawmthu a sawi.