Zo zirlaite'n NIT, Mizoramah zirna an chhunzawm theih dan tur ngaihven

Mizo Students’ Union (MSU) Gen. Hqrs hruaitute chuan nimin khan National Institute of Technology (MIT), Mizoram director Prof. S Sundar an hmu a, Manipur buaina vanga NIT, Manipur-a zirna chhunzawm thei lo Zo hnahthlak zirlaite NIT, Mizorama an zir chhun-zawm theih dan tur ngaih-tuahpui turin an ngen.

Kuki Student’s Organisation-in an ngenna angin MSU hruaitute chuan NIT, Mizoram Director an hmu a; NIT, Manipur-a Zo hnahthlak zirlai 38-te'n an zirna hmun pangngaiah zirna an chhun theih tawh loh avangin NIT, Mizoramah an zir chhunzawm theih nan hma laksak turin an ngen a ni.

MSU hruaitute chuan, Zo hnathlak zirlaite'n Manipur buaina vangin zirna an chhunzawm thei tawh lo a, semester hnih an hloh tawh niin an sawi. Prof. S Sundar chuan, NIT, Manipur-a Zo hnahthlak zirlaite'n zirna an chhunzawm ngei theihna turin Ministry of Education leh NIT, Manipur Director hnena a thlen tur thu a lo hrilh tih MSU chuan an tarlang.

Prof. S Sundar chuan, exam buatsaih mai tawh tur an tawh avangin semester ṭan leh hun, August 1, 2024 hma chuan zirlaite dinhmun tur hriat theih a beisei thu MSU hruaitute a lo hrilh a; zirlaite'n eng tik lai pawhin NIT, Mizoramah class an chhim phal a nih thu a sawi bawk.