MSHCS-in Dec.2023 thleng bill pe tawh; 2024-25 health care policy buaipui mek

Mizoram State Health Care Scheme (MSHCS) hnuaiah damdawi-ina damlo inenkawlna senso (bill), December 2023 thlenga dawnte pek tawh a ni. Hetih lai hian, kum 2024-25 health care policy atana scheme kalpui dan tur sorkarin a buaipui mek.

RTI Act tlawhchhana zawhna Mizoram State Health Care Society SPIO-in a chhan danin, April 22, 2024 thleng khan damlote bill an dawn zingah December 2023 thlenga bill lutte sorkarin a pe tawh a; damlo bill dawn tawh, pawisa la pek loh 1,410 a awm a, chu'ng bill-tea sum zat chu Rs 4,65,79,491 a ni.

MSHCS SPIO chuan, financial year 2024-25 chhunga damlo bill chungchang zawhna chhangin, "Kum 2024-25 atan health care policy ṭan a la ni lo a, tun dinhmunah hian sorkarin scheme thar tur a duante buaipui mek niin, kalpui ṭan a la ni lo," a ti.

MSHCS hnenah hian damlo bill atan March 6, 2024 khan sorkarin Rs 50,00,00,000 (vbc. 50) a pe a, April 22, 2024 thleng khan pawisa a pek belh tawh rih lo.

Sorkar kum kal ta 2023-24 chhung khan Mizoram sorkarin damlo bill atan Rs 1,12,00,00,000 (vbc. 112) a pe a; chu'ng zinga Rs 47,00,00,000 (41.96%) chu sorkar hmasa (MNF kaihhruai)-in a pek niin, a bak Rs 65,00,00,000 (58.04%) chu sorkar thar (ZPM kaihhruai)-in a pek a ni.