State Project Monitoring Committee-in Lengpui Airport-a hnathawh an endik

Mizoram sorkar hnuaia project awm mekte endika zir chiang tur leh hmalakna ṭha zawk a awm theihna atana ruahmanna siam tura din Mizoram State Project Monitoring Committee (MSPMC) member-te chuan April 22, Thawhṭanni khan an vice chairman Lalrinawma, IRS (Rtd) kaihhruaiin Lengpui Airport-a hnathawhte an endik.

Endiknaah hian MSPMC Vice Chairman bakah, secretary Vanlalruata Sailo leh member pali an tel a; PWD, Power & Electricity leh PHE department hotute leh Lengpui VC President an tel bawk. Airport-a hnathawh hrang hrangah hmasawnna la awm theih dan tur leh project awm laite changtlung leh chak zawka kalpui a nih theih dan tur enfiahin an sawiho a ni.

Mizoram State Project Monitoring Committee hi Planning and Programme Implementation department enkawlna hnuaia din a ni a, chairman chu Chief Minister a ni. Vice chairman, secretary leh committee member bakah, political party, tlawmngai pawlte aṭangin member mi 12 an awm.

MSPMC tum ber chu - Mizoram sorkar hnuaia project hrang hrang awm mekte endik a, changtlung leh ṭha zawka kalpui dan tur zir chian leh, a hun taka zawh a nih theih nana hmalakna tur awm theite enfiah leh bawhzui a ni.