Tun hnaiah in 456 a chhia

Tun hnaia ruah sur, thli tleh leh rial tla vangin Mizoram hmun hrang hrangah chenna in 456 a chhia a, chhiatna thleng vangin mi pakhat a hliam.

Disaster Management and Rehabilitation (DMR) department chhinchhiah danin, Aizawl, Kolasib, Champhai leh Khawzawl district-in ruah sur, thli tleh leh rial tla an tuarna zual a ni.

Kolasib district-ah chenna in 265 a chhia a, mi 13,976 a ngawng. In chhia zingah cement concrete-te pawh a tel. Aizawl district-ah in 178 a chhia a; Falkawna hmeichhe pakhat chu an in thliin a len thlûk vangin a hliam.

Thlipui leh rial tlain a tihchhiat zingah hian UPC-NEI biak in leh Tualte khuaa Presbyterian Kohhran biak in a tel a; Kolasib district-ah anganwadi leh sorkar in pawimawh bakah, mimal chenna in chhia a awm nual.

Champhai district-ah North Khawbung, Champhai Kahrawt leh Bungzung khuaah chenna in chhia a awm a; Khawzawl district-ah biak-in pahnih a chhiat bakah, chenna in 10 a chhia a ni.

Chhiatna tâwkte hnenah hian an mamawh angin tarpauline pek a ni a, State Disaster Response Fund (SDRF) hnuaiah chhawmdawlna pek tur a ni bawk.