CYMA President-in raltlan kaihhnawihah Kolkata-a US Consul General a kâwm

Central YMA president Lalhmachhuana chuan April 20, Inrinni khan Kolkata-a US consul general Melinda Pavek leh a thawhpuite a kâwm a, Myanmar ram buaina vanga Mizorama râltlan awmte ṭanpuina chungchang a sawipui.

Lalhmachhuana chuan, Myanmar aṭanga raltlante chu ṭanpui an ngaih thu sawiin, "India sorkarin ṭanpuina a pe lo a, a buaithlak hle. State sorkar tan sum leh pai a harsa si a, duh angin ṭanpui theih an ni lo," a ti.

Melinda Pavek chuan, Impulse NGO Network kaltlanga US sorkarin ṭanpuina pek ṭhin dan sawiin, chumi atan chuan India sorkarin Foreign Contribution (Regulation) Act a tihnun leh vat a ṭul thu CYMA President a hrilh.

US Consul General chuan, CYMA President chu USA-ah a kal thei a nih chuan US sorkara Myanmar lam changtu sorkar hotute nen an inkawm theih dan tur ngaihtuahpui a tiam a ni.

CYMA President hian AMRI Hospital leh Apollo Hospital-a damlote a tlawh a, an harsatnate a zawt. Damdawi-in hotute pawh kâwmin, Mizo damlote ngaihsak lehzual tur leh awlsam zawka an inentir theih dan tur nia a hriatte a sawipui bawk nia thu dawn a ni.