MJA member-te'n Sericulture Complex an tlawh

MJA member-te chuan nimin khan Zemabawka Govt. Sericulture Complex an tlawh a; thawktute'n an hmunhmáte fanpuiin, hna an thawh dante an hrilhfiah.

MJA-te hi Sericulture secretary Thlamuana hoin thawktute'n an lo dawngsawng a; Thlamuana chuan, MJA-te'n an department hmunhma an tlawh chu lawmawm a tih thu sawiin, nakkin zelah pawh thawhhopuiah a sawm.

Sericulture Complex-ah hian maimaw pangang (silk) lâ an siam chhuah bakah training centre a awm a; la deh chhuah lama tuite a thláwnin training pek ṭhin an ni.

Zawhna chhangin Sericulture department hotute chuan, cocoon duhkhawp lei tur an nei lo tih an sawi a, "Cocoon hi lei tur awm ang ang chu kan lei ṭhin a, district tinah a leina tur kan buatsaih a ni," an ti.

Cocoon hi Sericulture department hian a ṭhat dan azirin kg. khat Rs. 150-250 velin an lei ṭhin. Loneitute hnenah phengphehlep vawi khat tui pakhat Rs. 3-in an lei thung. Phengphehlep tuiah hian tui 300/400 vel a awm thin.

Sericulture department hotute chuan, an silk siam chhuah chu tualchhungah an hralh ṭhin thu sawiin, "Hralhna lamah harsatna a awm lo,' an ti a; silk atana tlak loh chu Assam leh Kolkata-a an hralh thin thu an sawi.

Thawktu indaih tâwk loh vangin harsatna an nei tih sawiin, Sericulture hotute chuan, "Project kan buaipuiah harsatna kan tawh phah fo," an ti. Sericulture department-ah hian thawktu 236 an awm mek a, post hnawhkhah loh 55 a awm a ni.