Vanglaini - Hnahthialah chawnghei titawp rih

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Hnahthialah chawnghei titawp rih

Hnahthial South-III Village Council siam thar danah Lungleng veng mipui an lungawi loh avanga July 27, 2020 aṭanga ṭhalai mi 50 vel chaw ngheite chuan bialtu MLA Dr R Lalthangliana, minister ngenna avangin nimin chawhma aṭang khan chaw nghei an titawp lailâwk. Chaw an nghei chhungin mi pariat chu damdawi-inah dah luh an ni.

Hnahthial Lungleng veng hian Hnahthial South-III VC siam thar vanga Lungleng venga chengte Hnahthial South-III ah chhungkaw 70 leh Hnahthial South-I chhungah chhungkhaw 60-a ṭhen an ni chu an duh lo a; an lungawi lohzia lantir nan July 27 khan VC thar siamna lehkha copy an hâl tawh a, July 27 aṭang khan ṭhalai 50 velin chaw an ngei ṭan bawk.

Lungleng veng hian VC pahniha ṭhen darh ai chuan, LAD Minister thurâwn angin Hnahthial South-III VC-a awm vek law law an duh a ni.

Lungleng JAC hruaitute leh bialtu MLA Dr R Lalthangliana chu nimin zing khan an inbia a; bialtu MLA chuan, an thil ngiat chu thil harsa lutuk a ni lo a, VC inthlan chungchanga nimina Chief Minister-te nen

ṭhutkhawmnaah a sawi chhuah tur thu sawiin, chawnghei chu titawp phawt turin a ngen.

Lungleng JAC chuan Minister ngenna chu an ngaihtuah nghal a, zahawm an tih avangin chawhma dar 10 aṭangin chawnghei chu an tihtawp lailâwk ta a ni. JAC hruaitute chuan, thu lawmawm an hria a nih loh chuan chawnghei chu chhunzawm leh nghal a nih tur thu an sawi.

Chaw ngheite chu Hnahthial damdawi-ina thawkte'n an enfiah reng a; chaw nghei zinga mi paruk - mipa leh hmeichhia pathum ve ve chu Ningani zan khan damdawi-inah dah luh an ni a, nimin zing khan mipa pahnih dah luh leh an ni bawk. Damdawi-ina lakte chu blood pressure chê, pum ná leh khaw-ṭhalo an ni tlangpui a, dinhmun hlauhthawnawm lutuk an awm lo nia thu dawn a ni.

Hetih lai hian, Hnahthial Chanmari Veng NGO Coordination Committee chuan July 30 khan thuchhuah an siam a; Hnahthial South-III VC thar siam a nih chu lawmawm an tih thu te, Lungleng vengin an dodal chu sorkar zahlohnaa an ngaih thu leh an dem thu te, VC siam thar chu an khaw hmasawnna tur a nih thute an tarlang.

Share this Post

Login to comment

No Comments