ZPM MLA Dr Vanlalthlana chuan nimin khan a bial, Aizawl North-II constituency chhunga college-te a tlawh a, MLA LADS fund aṭangin Zirtiri Residential Science College hnenah Rs. 1,00,000 leh Aizawl North College hnenah Rs. 50,000 a pe.

Dr Vanlalthlana chuan, college zirtirtu a nih avang­in college admission tih laiin zirlai harsa tak takte'n admission an tih theih nan a zirtirtupuite nen an lo ṭanpui ṭhin tih sawiin, "Covid-19 hripui léngin mi tam tak eizawnnaah harsatna a siam avangin ka biala awm college pahnihah pawh hian zirlai ṭanpui ngai bik kum dang aia an tam a rinawm a ni," a ti. MLA hian Aizawl North College hnenah a hmain Rs. 50,000 a lo pe tawh bawk.

ZPM MLA dang Andrew H Thangliana chuan Bukpui damdawi-in PHC hnenah PPE leh face shield ṭhahnem tak pein, medical officer Dr Michael Lalremsiami hnenah a hlân a; kum 1993-a din Bukpui PHC-in tun thlengin tui connection a la neih loh avangin MLA fund aṭanga tuizém (reservoir tanky) siam nan work order tihfel a ni tawh thu leh, Kawnpui damdawi-ina office leh laboratory buiding pawh MLA fund aṭanga sak a ni dawn thu a sawi.

Share this Post