Police-in AR Commandant an kawl rih dawn

Aizawl District Court chuan, rangkachak rûkbo thubuaia police-in May 5, 2016-a an man, 39 Assam Rifles commandant Col. Jasjit Singh chu police-in darkar 72 chhung an kawl zui a phalsak.

Police aṭanga thu dawn danin, rangkachak rûkbo chungchang chhuitu State Investigation Team (SIT) chuan Col. Jasjit Singh chu thu zawhfiah tur a la tam avangin nimin khan Court-ah kawl zui zel phalna an dil a ni.

Thu dawn danin, he thubuai ngaihven hian central intelligence lam pawh Aizawlah an rawn kal tawh a, Assam Rifles headquarters pawhin thubuai vil turin AR Inspector General pakhat chu Aizawlah rawn tírin Aizawlah a chám mek.

Mizoram police-te'n Col. Jasjit Singh an man hma hian sipai hotute aṭangin man phalna an la hmasa nia thu dawn a ni bawk.

December 14, 2015 zan dar 12 vela Melthum leh Hualngohmun inkar, Zampuimanga Thlan bula dan loa rangkachak kg. 50 tawlhruk phurtu silai nena suam leh rangkachak rûkbo chungchangah hian police-te chuan April 22, 2016 khan Lalmuanawma Mathipi, Zonuam, Aizawl in an dap a, a tûk April 23-ah Lalmuanawma Mathipi leh a thurualpui nia hriat, Bulaki Chand Baid, Laipuitlang te chu an man hmasa ber a.

He thubuaiah hian police-te chuan Assam Rifles mi pakua leh civil mi pali an man tawh a; civil mi pahnih chu jail-ah dah niin, a bak zawng thu zawhfiah atan an la kawl.

Civil mi jail tángte chu an man hmasak pahnih Lalmuanawma Mathipi leh Bulaki Chand Baid-te an ni a; thu zawhfiah atana kawlte chu - Lalrosiama, Kanan leh Zo-biakkima, Luangmual te an ni.

Assam Rifles mi an mante chu - Col. Jasjit Singh bakah, Sub. KC Roy, Hav. Ganesh Mahto, Hav. Balbir Singh, Hav. L John Singh, rifleman pali - Ramnunsanga, Lalfakawma, Pachhunga leh S Madhu te an ni.

Court phalna angin police-te chuan Assam Rifles mi pariat leh civil mi pahnihte pawh thu zawhfiah atan an la kawl a; thu zawhfiah tur mi dang pawh an la awm an ring bawk.