Agriculture Minister-in GLIU a hawng

United Nations Food and Agriculture Organization (FAO) hnuai­a Green-Ag: Green Landscape Implementation Unit (GLIU) chu nimin khan Agriculture minister C Lalrinsanga'n Agriculture complex, Lungleiah a hawng.

Agriculture Minister chuan GLIU chu hmasawnna huap zau leh daih rei tak kan neih theihna tura duan anih thu sawiin, "He project hnuaiah hian Agriculture department hmalaknate chu ramngaw leh nungchate humhalh chunga kalpui a ni dawn. He Project hi Lunglei district chhunga Thorangtlang Wildlife Sanctuary leh Mamit district huam chhunga Dampa Tiger Reserve-te chhehvel khaw 30-ah bul ṭan a ni dawn a, khaw dangah pawh kalpui zel a ni ang," a ti.

Khawvelin hun harsa tak a tawh mek laia India rama state panga Global Environment Facility in ṭanpuina a pek zinga Mizoram a rawn thlang ve hi a lawmawm takzet thu sawiin C Lalrinsanga chuan, "He project hnuaia hmasawnna tura rua­hmanna siamte chu a huam tur khuate tan malsawmna nasa tak a nih ngei ka beisei," a ti a, state panga thlanchhuah - Ma­dhya Pradesh, Mizoram, Odisha, Rajasthan leh Uttarakhand-te zingah Mizoram chu hma la chak ber a nih thu a sawi.

Agriculture Minister chuan GLIU chuan nghawng thui tak a la nei zel dawn tih sawiin, "Agriculture leh ramngaw humhalh lama hmasawnna piah lamah kuthnathawktute tan eizawnna ngelnghet leh eco tourism lam thlengin hmasawnna nasa tak a thlen dawn. He project huapzau tak hi Agriculture department chauhin a ti hlawhtling thei lo," a ti a, GLIU a hlawhtlin theihna atan Line department hrang hrang leh district administration-te thawhhopuiah a sawm.

GLIU hawnna inkhawmah hian Lunglei HPC vice chairman Lawm­awma Tochhawng, Agriculture secretary Lalhmingthanga leh Agriculture director Rohming­thanga Colney-te pawh an tel.

GLIU hi kum 6 - April 1, 2019 aṭanga March 31, 2020 chhung atan ruahman a ni. Project kalpui tur hian state thlan­chhuah pangate budget inṭawm chu US dollar 33,558,716 a chhut a ni. GLIU project kalpui a nih chhung hian a huam chhunga khaw hrang hrang a loneitute hmasawnna tur kawng chi hrang hrang bakah ramngaw leh nungcha humhalh te, project a zawh hnu pawh a eizawnna ngelnghet neihna tur lam hawia hmalak a ni dawn a ni.



Share this Post

Login to comment
No Comments