Mizoram sorkar chuan inkharkhip aṭanga inthlahdulna atana kaihhruaina thar, Unlock 2.0 a tichhuak a, vawiin aṭangin hman ṭan a ni ang. Zana curfew kalpui ṭan hun chu darkar khata sawn tlaiin, dar 8:30 aṭangin kalpui ṭan a ni dawn a; August thla chhung zawng chu zirna-in zawng zawng leh biak-ina inkhawmte tih theih a la ni dawn lo.
Unlock 2.0 inkaihhruaina hi chief secretary Lalnunmawia Chuaungo, Mizoram State Disaster Management Authority hnuaia State Executive Committee chairman ni bawk chuan nimin khan a tichhuak a; August 1-31, 2020 chhunga hman tur a ni.
Inkaihhruaina thar ang chuan, Aizawl leh district khawpui tinah zan dar 8:30 leh zing dar 4:30 inkarah páwn chhuah khap (curfew) a ni dawn a; chhûn lama lirthei intlàn chhâwk dan hman lai chu tihdanglam niin, inkhàrkhip ṭan hmaa intlan chhâwk dan anga kal tur a ni.
Sakhaw thila pun khawm phal a la ni lo a, zinga ṭawngṭai inkhawm erawh chu Unlock 1.0 angin mi 50 aia tam loin neih theih a ni. Mipuiin a hmuna an en theih tur games & sports tournament huaihawt phal a ni lo a, entu mipui punkhawmna tel lo leh mi 25 aia tam loin games & sports practice phal a ni thung.
Login to comment
No Comments