Power MW 29 pe chuak thei tur Mizoram sorkarin a buaipui mek

Mizoramah power mega­watt (MW) 29 pe chhuak thei tur solar power plant leh hydel project buaipui mek a ni. Hei bakah hian, MW 5 pe chhuak thei tur solar power plant siam hna thawk tur tender hmanga zawn mek a ni bawk.

Vanglaini palai zawhna chhangin Power & Electricity minister R Lalzirliana chuan, kawlphetha MW 20 pe chhuak thei tur Vankal Solar Power Plant te, MW 5 pe chhuak thei tur Tlawva Small Hydel Project (SHP) leh MW 4 pe chhuak thei tur Kawlbem SHP buaipui mek a nih thu a sawi a, "Tlawva SHP hi chu zawh a ni tawh a, a hawng turin company lam an lo tel a ngai a, Covid-19 vangin an rawn kal thei rih lo," a ti.

Power & Electricity Minis­ter sawi danin, Vankal Solar Power Plant atan solar plant a rawn thleng thei rih lo a, a thlen hma theih chuan kumin sorkar kum chhunga zawh theih beisei a ni. Kawlbem SHP atan a kháwlpui a thleng tawh a, a bunna tur in sak a la ni lo thung.

Kawlphetha MW 5 pe chhuak thei tur solar power plant siam tur zawnna atan tender chhuah a ni tawh a, Keifang ramah siam tura ruahman a ni. Solar power plant siam hna hi company-te'n anmahni sumin an thawk a, Mizoram sorkarin ram ngaihtuahin, power siam chhuahte pawh Mizoram sorkarin a leisak dawn a ni.



Share this Post

Login to comment
No Comments