Vanglaini - Mapping & Population Size Estimation hawng Aizawlah lockdown laiin HIV+ve 26 hmu chhuak

KHAWTHLIR

Lusûn khawhar

Liankunga (69), IAS (Rtd.) h/o Zalianthangi, Chaltlang, Aizawl chu nimin chhun dar 12:17 khan zunthlum natna vangin a thi a, nizan khan lumen niin, vawiin chawhma dar 11-ah vui a ni ang. Liankunga hi February 14, 1951-ah Khawbélah a piang a, fa pathum leh tu pali an nei. Mizoramah hna hrang hrang a thawk tawh a, kum 1981-ah police SI-ah a inziak tling a, kum 1982-ah Account & Treasury-ah assistant auditor-ah a inziak tling leh. Kum 1985-ah IAS-ah a inziak tling a, a hmain IAAS-ah tling bawk. IAS-ah hian Bihar cadre a ni a, Bihar sorkara principal secretary a nih laiin May 31, 2017-ah a pension a ni.

YMA din remti

YMA Central Executive Committee (CEC) nimina ṭhukhawm chuan, YMA branch thar pathum - Kharzawl branch (Serlui group), Halam Punjee branch (Zampuimanga group) leh Kolasib Venglai East branch-te din an remti. YMA branch pathum din thar a nih chuan YMA branch 811 a awm tawh ang.

CM-in thawh

Chief minister Zoramthanga chuan Covid-19 dona atan July-a a hlawh (basic pay) aṭanga 60% (Rs. 48,000) chu nimin khan Chief Minister's Relief Fund-ah a thawh.

Sample 100 en

ZMC Covid-19 Laboratory-ah nimin khan mi 100 velte swab sample endik a ni a, zan lamah result a chhuah beisei a ni. Sample endikte chu SRH-ZMC-a awmte bakah, Aizawl, Mamit leh Champhai aṭanga dawnte a ni.

Covid-19 vei mek ICU-ah 2 an awm

State Referral Hospital-ah nimin khan Covid-19 vei mi pathum leh rinhlelh thilah mi pathum dah luh thar an ni. SRH-ah hian Covid-19 vei mi 17 enkawl mek an ni a, ICU-a mi pahnih, SICU-ah mi pakhat leh Isolation Ward-ah mi 14 an awm. ICU-a awm pakhat zawk ventilator hmantir mek chuan hma a sawn hret a, Isolation Ward-a awm zingah khawsik leh thawhah nasa vak lo nei mi pali awm mah se, ngaihtuahawm an ni lo tih, SRH-ZMC Bulletin chuan a tarlang.

DAWNTISEI

Mapping & Population Size Estimation hawng Aizawlah lockdown laiin HIV+ve 26 hmu chhuak

Aizawl district-a HIV kai awlsam bika ngaih - hmeichhe inzuar ṭhin te, ruihna atana damdawia inchiu ṭhinte leh mipa mahni anpui kawp ṭhin inthupte zat chhiarpui neihna tur - Mapping and Population Size Estimation chu nimin khan Aizawl SP conference hall-ah Aizawl additional DC K Vanlalruati'n a hawng. Aizawl district-ah Covid-19 lockdown chhungin HIV vei mi 26 hmuh chhuah a ni tawh.

K Vanlalruati chuan, NACO-in distict tinah HIV high risk group (HIV kai awlsam bika ngaih)-te chhiarpui neihna turin district AIDS control officer kaihhruai Community Advisory Board din tura a ruahman a nih thu leh, Board-ah chuan MSACS official te, Aizawl SP, Mizoram Kohhran Hruaitute Committee (MKHC), Central YMA, MHIP leh Aizawl City Local Council Association aiawhte an tel dawn thu a sawi.

HIV kai awlsam leh mi danga kai darhna thlentu tama high risk group awm zat chhiarpui neihna turin NACO leh Indian Council of Medical Research (ICMR)-in Mapping and Population Size Estimation an ruahman a, India rama district zawng zawngah kalpui

ṭan a ni. Mizoramah pawh district tinah kalpui tura ruahman a ni a, a enchhin nan NACO chuan nikum khan Mamit district chu pilot project atan a thlang a, ṭha an tih avangin ram pumah kalpui a ni ta a ni.

Aizawl district bikah financial year 2020-21 kal mekah lockdown chhungin, June 2020 thleng khan thisen endik mi 813 zingah HIV hrik pai mi 26 hmuh chhuah an ni a; lockdown vangin duh angin thisen endik a tam lo tih an tarlang.

April-June 2020 chhunga HIV vei mi 26 hmuh chhuahte chu ruihhloa inchiu ṭhin (injecting drugs user - IDU) vek an ni a; hmeichhe inzuar (female sex worker - FSW) leh mipa mahni anpui kawp (man sex with man - MSM) zingah HIV vei hmuh chhuah an awm lo. Thla thum chhung hian ruihhloa inchui ṭhin mi 684, FSW mi 21 leh MSM mi 108-te thisen endik a ni.

Aizawl district-ah April 2014 aṭanga June 2020 thlengin thisen 2,06,419 endik aṭangin HIV vei mi 9,067 hmuh chhuah an ni a, chu'ng zinga 5,819 (64.18%) chu mipa niin, mi 3,248 (35.82%) chu hmeichhia an ni. HIV vei mi 9067 zingah enkawlna Anti Retroviral Therapy (ART) la mi 2,119 (23.37%) chauh an awm a, ART la lo mi 6,940 (76.63%) an awm.

June 2020 thlengin Aizawl district-ah IDU mi 5,000 ziah luh a ni a, MSM mi 583 leh FSW mi 252 chhinchhiah a ni bawk.

Share this Post

Login to comment

No Comments