Ram tan theihtawp ka chhuah ang - Richard Vanlalhmangaiha

ZPM party chuan nimin khan Lok Sabha inthlan atan Hnahthialah street campaign an buatsaih. ZPM candidate Richard Vanlalhmangaiha chuan, thlan tlin a nih chuan Mizoram tan theihtawp a chhuah dawn thu a sawi.

Richard Vanlalhmangaiha chuan, Pathian leh mipui zarah MP atan thlan a nih chuan Mizoramin hmasawnna ro tling a neih theihna turin theihtawp a chhuah dawn tih a sawi a, "Mizoram sorkar leh sorkar laipui inkara indawrnaah leilâwnah ka ṭang dawn. Mizoram chhung leh pâwn lam tana ṭangkai thei ang berin hna thawk turin ka rawn pên chhuak a ni," a ti.

Sorkar tharah kut hnathawktute chawikan nan hma nasa taka lak a ni dawn tih sawiin Richard-a chuan, "Tunlai thiamna leh khawl changkang zawk hmangin loneitute tana awlsam leh hlawk zawka thlai thar sâwngbâwl dante ngaihtuah a ni zel dawn," a ti a; sorkar laipui hnuaia kut hnathawktute tana hamṭhatna awmte tun aia nasa zawka hai chhuah an tum dawn thu a sawi.

Richard Vanlalhmangaiha chuan, Mizo hnam leh sakhua a him zel theih nan amah vote turin South Tuipui bial mipui a ngen a ni.