MPSC exam buatsaih dan an sawifiah; MPSC hi a rintlak zel dawn - Chairman

Mizoram Public Service Commission (MPSC) hotute chuan nimin khan an pisaah thuthar thehdarhtute kâwmin, exam an buatsaih ṭhin dan an sawifiah. MPSC chairman JC Ramthanga chuan, MPSC chu a rintlak zel dawn thu a sawi.

MPSC Chairman chuan, exam buatsaihah India ram a changtlun thu sawiin, "UPSC ṭha tak kan nei a, state dangte'n kan entawn. A sang china hna lak hi a hautak a, felfai lo tih dawn chuan ni chiah lo, tute emaw mitah chuan fel lo anga lang a awm lo. Chuvangin inhrilhfiah a ṭul ṭhin," a ti.

MPSC chu ngawi renga hna thawk ṭhin a nia sawiin JC Ramthanga chuan, "Ka hun ve chhung pawhin hmasawnna kan nei nasain ka hria," a ti a, MPSC chu a rintlak a, rintlakin hna a thawh zel dawn thu a sawi.

Zawhna chhangin JC Ramthanga chuan, ZPM-in sorkarna an chan hnuah Chief Minister-in mobile phone kaltlanga a biak thu sawiin, "Autonomous body ni mah ila, Mizoram sorkar hnathawktu tur latu tur kan nih avangin sorkarin mawhphurhna min pek apiang ti mai tur kan ni. Thuam chak erawh kan ngai," a ti.

MPSC Chairman sawi danin, Mizoram sorkarin MPSC a thuam chak mek a, MPSC secretary chu IAS cadre ni tura tih thar a ni. Additional secretary, joint controller of examination bakah a hnuai lamah pawh thawktu eng emaw zat pek belh a ni bawk.

Tun hnaiah media hrang hrangah MPSC exam kalphung chungchang leh a bik takin MCS (Combined) Examination 2023 chungchangah thu léngvâk a tam tih sawiin MPSC hotute chuan, exam beitute rilruah leh mipuiah hlauhthawnna a thlen theih avangin sawifiahna an siam tih an sawi.

MPSC hotute chuan, written-a mark hmuh zat chu MPSC Chairman leh member-te'n interview hmain an hriat ngai loh thu an sawi a, "Interview-tu tur an nih avangin an tan hriat a rem lo," an ti.

Ṭum eng emaw zat MPSC chuan court-ah khin an tawh tawh thu sawiin MPSC hotute chuan, "State dangin public service commission-te pawh hian court-a khin an tâwk ve nasa," an ti a, MPSC chuan court-a khin an tawhin chak loh an la neih loh thu an sawi bawk.

EXAM SHEET ENDIK CHUNGCHANG

• Direct recruitment-ah written exam zawhna chhanna endik dan (evaluation) kalphung fel tak a awm a, chhâwng thuma kalpui a ni a; evaluator-te chu first evaluator, second evaluator leh third evaluator/scrutiniser tih an ni.

• First evaluator-in answer sheet a endik hnuah tabulation sheet-ah a mark pek a chhinchhiah a, chumi hnuah MPSC-ah a thehlut ṭhin. Evaluator-te chu answer sheet-ah mark pe lo tura tih an ni a, evaluator ṭhenkhatin answer sheet-ah mark an lo pe palh fo.

• Asnwer sheet-a mark ziah chu second evaluator-a pek a nih hmain thai chhiat (hnawih vàr) ṭhin a ni. Hei hi second evaluator-in first evaluator mark pek hre miah loa evaluation a kalpui theih nana tih a ni.

• First evaluator-in mark a pekna table pawh thlak nih hnuah second evaluator hnenah answer sheet pek leh a ni a, first evaluator-in mark a pek zat second evaluator-in hre miah loa independent evaluation a kalpui theihna tura ruahman a ni. Second evaluator-in a mark pek chu tabulation sheet-a a dah hnuah MPSC-ah thehluh a ni.

• Evaluation stage I & II tih zawhah scrutiniser hnenah pek a ni a; scrutiniser-in first leh second evaluator mark pekte enin, siamṭhat ngai leh tihdik ngaite siamṭhain scrutiniser-in final mark a siam ṭhin.

• MPSC office-in result a siamna turah scrutiniser-te'n final mark an siam chu uluk taka endik hnuah tabulation tih ṭhin a ni. MPSC-in mark belh emaw paih emaw a nei ngai lo.