Ruallung naupang thih chhan chhui chian ngei a nih beisei

Ruallung Welfare, Aizawl leh Rulchawm Welfare, Aizawl chuan nimin khan thuchhuah inṭâwm siamin, Lalfakzuala (13) s/o T Lalchhuanmawia, Ruallung, March 13, 2024-a LRM Hospital, Aizawla a thih chhan dik tak chhui chian a nih ngei an beisei thu an tarlang.

Ruallung leh Rul­chawm welfare-te chuan Lalfakzuala tonsil zai a nih hnu lawka a thi chu pawi an tih thu leh a chhungte an tawrhpui thu an tarlang a, "Faktea hi rawlthar harhvâng leh chak ṭha pangngai tak ni chung si a, operation theatre-a lak luh a nih hnu rei lo têa a thi ta mai hian min ṭháwng em em a, a thih chhan dik tak chhui chian a nih ngei kan beisei tlat a ni," an ti.

Khaw pahnih welfare-te chuan, Lalfakzuala thihna chungchanga Ruallung VC leh NGO-te hmalak mekna chu a tàwp thlenga an thlàwp tlat dawn thu an tarlang a; Lalfakzuala thihna ang chu tu chungah mah a thlen tawh loh nan damdawi-ina thawktute'n fimkhur nan hmang se an duh thu an tarlang bawk.