Observer-te'n inpuahchah dan an endik

Lok Sabha General Election 2024 neih tura Mizorama expenditure olbserver Arvind Sharma leh police observer K Satyanarayana te chuan nimin khan Kolasib tlawhin, inthlanna atana inpuahchahna hrang hrang an endik.

Observer pahnihte hian Kolasib DC Conference Hall-ah nodal officer, assistant expenditure observer, video viewing team, video surveillance team leh flying squad-te nen an inkâwm a, Kolasib district election officer leh bawrhsap John LT Sanga'mn a kaihruai.

Expenditure observer Arvind Sharma chuan, Mizoram chu state rálmuang a nih angin inthlanna felfai leh thianghlim kalpui a nih ngei a beisei thu a sawi a; Lok Sabha inthlan tura ECI-in inkaihhruaina a duante uluk taka chhiar turin leh mawhphurhna hrang hrangte ṭha taka hlenchhuak turin kalkhawmte a chah.

Arvind Sharma chuan, candidate-te'n intluk tláng taka vote an zawn theih nan ECI-in sum hman theih zat a bituk thu sawiin, assistant expenditure observer leh team hrang hrangte'n campaign-nate uluk taka an vil a ngaih thu a sawi bawk.

Police observer K Satyanarayana chuan, inthlanna kalpui chhunga harsatna awm thei zawng zawng uluk tak a zir chiang tur leh harsatna awm theite chinfel zung zung a nih theih nan ruahmanna felfai tak siam turin team hrang hrangte a chah.

Inkawmhonaah hian inbiakpawhna leh inkalpawhna chungchanga harsatna awm thei te, ruih theih thil che vel thlithlai leh silai leh puak thei thil khuahkhirhna kalpui dante sawiho a ni bawk.

Bawrhsap John LT Sanga chuan Kolasib district-a polling station awm dan leh polling official inruat dante leh SVEEP kaltlanga vote thlak tura mipui zirtirna kalpui dante a sawifiah a ni.