Para legal volunteer-te pualin hun hmang

Mamit District Legal Service Authority (DLSA) chuan an secretary H Lalduhsanga, Mamit district chief judicial magistrate hoin nimin khan DLSA hnuaia para legal volunteer (PLV)-te pualin an hnathawhna leh dan chungchanga inzirtirna an buatsaih.

H Lalduhsanga chuan, dan hriat loh chu court-ah thiam channa tham a ni lo tih sawiin, mipuiin dan an hriat theih nan mipuite dan zirtirna lamah theihtawp chhuah turin PLV-te a fuih a; chetsualna, khuarel chhiatna leh mi kut tawrh vanga ramtuileilote tana court kaltlanga ṭanpuina awm theite sawiin, chutiang mamawhtute chu kal chilh a, theihtawp chhuaha zirtir leh hrilhfiah hna thawk zel turin a chah.

PLV-te hian an president Laltharzeli hoin nimin khan Mamit District Jail, Mamit Police Station leh Excise custody-te an tlawh. PLV-te hnena an lo hrilh danin, kumin January-March chhungin Excise & Narcotic department-in zu leh ruihhlo kaihhnawihah thubuai 97 an ziak lut tawh a; Mamit PS-in thubuai 25 ziak lut tawhin, chu'ng zingah chuan pawngsual thubuai pahnih a tel.

Mamit District Jail-ah táng mi 74 an awm mek a, mipa 68 leh hmeichhia paruk an nih thu an lo hrilh bawk.