FLAM-in MPF tan hmalak zui an remti

Former Legislators Association of Mizoram (FLAM) chuan nimin khan Mizoram Legislative Assembly conference hall-ah General Body Meeting an hmang a; Mizoramah inthlanna fel leh thianghlim a awm theihna tura MPF hmalakna a chak zel theih nan kohhran lian la tel ve lote an tel theih nana hmalakna zui zel an remti.

FLAM chuan an inkhawmpuiah hian resolution an siam a, "Mizoramah inthlanna fel leh thianghlim neih a nih theih nana hma nasa taka la ṭhintu MPF hi a lo chak chhoh zel theih nan kohhran lian deuh deuh la tel ve lote an tel ve theih nana kan hmalakna hi chhunzawm zel ni se," an ti.

FLAM General Body Meeting-ah hian member 36 an tel a, resolution panga an pawm. Kum 2024-2026 chhunga hruaitu turte an thlang a, president atan Liansuama, vice president atan Prof. JV Hluna leh treasurer atan Rochhunga Ralte te an thlang a ni.

FLAM RESOLUTION DANGTE

1. FLAM member-te hian kan ram leh hnam tan theihtawp kan lo chhuah ṭhin tawhnate hre rengin kan theihna zâwn ṭheuhah theihtawp chhuah chhunzawm zel ni se.

2. Mizoram sorkar thar lo piang hi lawmawm kan ti a, ram leh hnam tana ṭha turah chuan theihtawpa ṭawiawm tlat kan tum.

3. Ramngaw, nungcha leh tuihna humhalhna kawnga hma kan lakna hi chhunzawm zel ni se. Tuihna humhalhna tura The Mizoram (Protection of Rivers) Act, 2023 Mizoram Legislative Assembly-a pass a lo ni ta hi lawmawm kan ti a, he dan a hlawhtlina kan tuihna kám zel tur vèn a nih theih nan he dana thuneitute leh Mizoram mipui lungrual taka theihtawp chhuah ṭheuh turin kan ngen a ni.