Vote tla a ṭhat dan tur sawiho

Lok Sabha General Election atana State Media Cell chuan nimin khan additional chief electoral officer Dr H Lianzela kaihhruaiin IPR conference hall, Lianchhiari Rûnah Lok Sabha inthlanpui neih tura vote tla a tam theih nan inràwnkhawmna an buatsaih a; kohhran hrang hrang ṭhalai pawl, tlawmngai pawl leh hnam bil zirlai pawl aiawhte an tel.

Additional CEO chuan, Mizoramah chuan Lok Sabha inthlan aiin MLA thlannaah vote tla a tam zawk hle ṭhin tih sawiin, "MLA thlannaah India rama vote tlak ṭha berte zinga mi kan nih laiin, a hnu lawk thla li vel lekah Lok Sabha MP kan thlang leh ṭhin a, national average pawh kan pha thei ngai meuh lo," a ti a; ṭhalaite zingah vote tla a ṭhat lehzual theih nan ṭan tlàn a ṭul thu a sawi.

Inrawnkhawmnaah hian deputy chief electoral officer Henry C Lalrawnkima leh additional SP (Crime) Zonunsanga ten inthlanpui neih tawha Mizoram dinhmun tlangpui leh, dan zawm tur pawimawhte an sawifiah a; sawihona hun hman nghal a ni. Sawihona aṭangin hmalakna thar duan tum a nih thu sorkar thuchhuahin a tarlang.