ZORO-in Chief Minister an ngen

Zo Re-Unification Organisation (ZORO) hruaitute chuan nimin khan chief minister Lalduhoma a pisaah an hmu a, Zo fate insuih khawmna leh rorelna pakhat hnuaia an awm theih nan hma lakpui turin an ngen.

ZORO hruaitute hian an hmalakna hrang hrang Chief Minister an sawipui a; Zo fate rorelna pakhat hnuaia an awm theih nan leh an insuih khawm theih nana hma lakpui tura an ngenna chungchangah CM Lalduhoma chuan, theihtawp a chhuah tur thu leh thawhho a ngaih thu a lo hrilh.

An phâk tâwk leh an theihtawpin khawvel hmun hrang hranga Mizote rorelna pakhat hnuaia an awm theih nan hma an la ṭhin nia sawiin ZORO hruaitute chuan, "Kan phâk tâwk leh theih tâwk a tam lo ṭhin hle. Mizoram state hi Zo fate tan chuan Jerusalem a ni a, Mizoram Chief Minister chu Zo fa zawng zawng tan Chief Minister a ni," an ti.

ZORO hian Chief Minister hnenah hian CM Relief Fund atan Rs 10,000 an hlân nghal a ni.