2023-24 chhungin Lawngtlai dist-ah nausen kum 1 hnuai lam 20 thi tawh

Kum 2023-24 chhungin Lawngtlai district-ah nausen kum khat hnuai lam 20 an thi tawh a, nau chungah nu panga an thi tawh.

Lawngtlai District Committee on Child Death Review (CDR) leh Maternal Death Review (MDR) chu nimin khan an chairman Cheemala Siva Gopal Reddy, district bawrhsap hoin a pisaah an ṭhukhawm a; kum 2023-24 chhunga Lawngtlai district-a naupang thihna leh nau chunga nu thihna thlen dan an thlirho.

Lawngtlai deputy chief medical officer Dr S Thaizi tarlan danin, kum 2023-24 chhungin Lawngtlai district-ah naupang kum 5 hnuai lam 23 an thi tawh a, chu'ng zinga 20 chu nausen kum 1 hnuai lam an ni. Nau neih leh a kaihhnawihah nu panga an thi tawh bawk.

Ṭhutkhawmah hian nausen thihna leh nau chunga nu thihna thlengte chu vanduaina vang te, ṭhenkhat chu harsatna an tawha damdawi-in panpui vat an nih loh vang te, damdawi-in panna kawnga harsatna a awm vang te, damdawi-in a changtlun tâwk loh vang te, nau pâi laia inenkawl ṭhat tâwk loh vangte nia a lan thu sawi a ni.

Lawngtlai DC chuan, Lawngtlai district-a hriselna kaihhnawiha thawktute inpekna leh thawhrimna fakawm a tih thu a sawi rualin, hriselna kawngah hmasawnna tur an la ngah hle tih a sawi a; harsatna hrang hrang karah theihtawp chhuah zel turin thawktute a chah.