Mipui sorkar aia party sorkar sawh nghet mekah MNF-in ZPM an puh
MNF Publicity Board vice chairman J Malsawmzuala Vanchhawng chuan nimin khan Aizawl Press Club-ah thuthar thehdarhtute a kâwm a; Mizorama sorkarna chelh mektu ZPM chu mipui sorkar aia party sorkar sawh nghet mekah a puh.
J Malsawmzuala Vanchhawng chuan, nimin kha ZPM sorkar ni 110 tlinna a nih thu sawiin, "Mipui sorkar ni loin, party sorkar, official-te pawh ring zo lo sorkar sawh ngheh mek a ni. December 8, 2023-a ni 100 chhunga sorkar hmalakna tur Chief Minister-in a puan khan point 6-naah sorkar official-te tel loa sorkar a kal theih loh thu leh dik taka hna an thawh tlàn a duh thu a sawi. Sorkar hmalak tawh dan en chuan ZPM sorkar hian official-te a ngai pawimawh lo mai ni loin, engahmah a ngai lo zawk hial niin a lang," a ti.
CM Office aṭangin Governor hmingin committee pawimawh eng emaw zat din a ni tawh tih sawiin J Malsawmzuala chuan, "He'ng committee-ah hian member-ah official lam an tel ngai lo a, sorkar hmalakna tur flagship programme leh programme dang pawimawh tak tak tihlawhtling tura din committee-ah member atana official ruat an ni lo zel mai hian entir dang a nei lo," a ti a; ZPM sorkar chu official-te ring zo lo a, ZPM party leh an sangawi zawnpui ṭhenkhatte nen sorkar khalh kal tumah a puh.
J Malsawmzuala chuan, ZPM kaihhruai sorkar chu sorkar thar a ni a, an intiamnate tihlawhtling vek turin hun a la tawi tih sawiin "Fîr taka teh hun a la ni lo. Chutihrual chuan, CM Pu Lalduhoma'n ni 100 chhunga anmahni tehna tur, sorkar lak luh nía a puan chhuah hmanga tehin, ZPM sorkar hlawhchhamna hmuh tur tam tak a awm der tawh a, a pawi kan ti," a ti a; beiseina sang tak nena thuneihna petu mipui an tibeidawng mek nia sawiin, vanduaithlak an tih thu a sawi bawk.
MNF PUBLICITY BOARD TARLAN DANGTE
▶ ZPM sorkar lo ding hi hun danga sorkar inthlak chhan, sorkar lai nin vang ni loin, mipui hnena beiseina sang tak an siam vanga mipuiten enchhin ve phawt an duh vang a ni ber.
▶ Ni 100 chuang chhunga sorkar kutke pawimawh an vuah chhoh dan leh an hmalakna tam takah mipui pawmpui theih loh leh beisei loh thil a tam. Hei hi beiseina sang tak neia sorkarna petu mipui zah lohna lian tak a ni.
▶ ZPM sorkarin sorkar hnathawkte tel loa party hruaitute leh an sangawi zawnpuite nena thutlukna lian zawng zawng an siam chho zel tur hi Mizoram sorkar kal zel turah a him lo.
▶ Committee pawimawh tak taka official tel àwm ngawih ngawihte pawh teltir an ni lo hian entir dang a nei lo a, an laka beiseina sang tak neitu mipui an phatsan chho zel tih a lantir.
▶ ZPM sorkar kal mek danah hian mipui hnena an inzawrhna lo ang zelin an kalah kan ngai.
▶ Beiseina sang tak neia thlang tlingtute beisei an pha loin, kalphung thar an zawrh chuan kalphung hlui an sawi chhiat tam tak pawh a pha lo hle.