KHAWTHLIR

Chhimtuipui tifai

World Water Day hmanna kal zelah Lawngtlaia PHE WATSAN Division leh Lai Autonomous District Council hnuaia a kaihhnawih department-e chuan nimin khan Lawngtlai Greater Water Supply Scheme tui lakna, Chhimtuipui (Tuipui Ferry bul)-a Chengpawng li leh a chhehvel tihfai hnatlang an huaihawt. Sorkar hnuaia thawktute, CYLA aiawhte leh DIET Lawngtlaia zirlaite telin, an vaiin mi 110 an hnatlang a ni.

CD ratio 69.40%

Champhai District Consultative Committee/ District Level Review Committee/ District Level Security Committee chu nimin khan an chairman James Lalrinchhana, bawrhsap hoin an ṭhukhawm a, bank hrang hrang kaltlanga April-December 2023 chhunga hmalaknate an thlir lêt. December 2023 thlenga Champhai district-a bank hrang hrangte credit deposit ratio chu 69.40% a ni a, CD ratio ṭha ni tura bituk zat 60% an khûm a ni.

Observer ruat

Lok Sabha inthlanpui awm turah Election Commission of India chuan Mizorama general observer atan Dr Nipun Vinayak, IAS (phone no. 9863904087) leh police observer atan K Satyanarayana, IPS (phone no. 6909002711)-te a ruat.

Dan thar zirho

Saitual police-te chuan nimin khan SP conference hall-ah criminal law thar zirhona an buatsaih a, Saitual Police Station leh beat post-a awmte hnenah first aid hmanrua hlan a ni. Saitual SP Pukhraj Kamal Gupta chuan IPC, CrPC leh Evidence Act-te chu Bharatiya Nayaya Sanhita 2023, Bharatiya Shaksaya Adhiniyam 2023 leh Bharatiya Nagarik Suraksha Sanhita 2023 hmangin thlak a nih thu leh, July 1, 2024 aṭangin India ram pumah hman tur a nih thu a sawi. Zirhonaah hian Phullen Beat Post leh Saitual PS-a thawk mi 35 an tel a ni.

Meizial man

Assam Rifles sipaite chuan March 26, Thawhlehni khan Champhai Ruantlang huam chhungah ram dang meizial dan loa lak luh bawmpui 100 an man a, Champhaia Customs Preventive Force hnenah an hlân. Foreign cigarette an man hi Rs 1,30,00,000 hû a ni.

MCC ngaihtuah

Lunglei district election officer Ramdinliani, bawrhsap hoin nimin khan DC conference hall-ah District Standing Committee on Model Code of Conduct an ṭhukhawm a, MCC palzûtna a awm leh awm loh hriat theih dan tur an ngaihtuah. DEO chuan, "Khawi hmunah pawh MCC bawhchhiatna awm in hriat chuan MCC Nodal Officer hnenah report theih reng a ni a, hemi atan hian MCC Nodal Officer phone number pawh mipui hnenah thehdarh tawh a ni," a ti.

SVEEP campaign

Mamit District Election Office chuan Systemetic Voter's Education and Electoral Participation (SVEEP) kaltlangin nimin khan Mamit Field kawn, Mamit Bazar Veng, Mamit Charkawn leh Dinthar Bazarahte vote thlak pawimawhna inzirtirna an buatsaih. Mamit SVEEP nodal officer Paul Rokima, IPRO chuan vote thlak pawimawhna leh mi tinin vote an thlak theihna tura ruahmannate a sawifiah.