Central-ah union minister nih theihna kan nei - Vanlalhmuaka

Mizoram Lok Sabha inthlanpui neih tura BJP candidate Vanlalhmuaka, Mizoram BJP president chuan, an thupui chu 'Mizoram first' tih a nih thu leh thlan tlin a nih chuan sorkar laipuiah union minister nih theihna a neih thu a sawi.

Vanlalhmuaka hian nimin khan Returning Officer hnenah nomination paper a thehlut a; thuthar thehdarhtute zawhna chhangin, "Kan thupui chu Mizoram first tih a ni. Hmarchhak state zingah Nagaland, Meghalaya leh Mizoram ten BJP sorkar hnuaiah central minister kan la nei lo a, tun ṭumah hian Nagaland leh Meghalaya hian BJP MP candidate an nei lo a, keini hi hmarchhak bialah BJP state president candidate nei awmchhun kan ni a, thlan tlin ka nih chuan central minister nih theihna kan nei," a ti.

NDA-a tel tum party pahnih candi­date-te an inkhin tur chungchangah Vanlal­hmuaka chuan, "Tuna NDA inti pakhat hi an NDA dan a chiang lo a, keini hi NDA neitu BJP kan ni," a ti a; Mizo ram, hnam leh sakhaw tana BJP-a lut a nih avangin a awm chhan tih­hlawh­tlin ngei a tum dawn thu a sawi.