BJP sorkarin min nêkchêpna hnûk lêt turin hma ka la ang - INC Candidate

Mizoram Lok Sabha inthlanpuia Indian National Congress (INC) candidate Lalbiakzama chuan, MP atan thlan tlin a nih chuan BJP sorkarin hnam hnufual leh tenaute an nêkchêpna leh palzûtna tam tak hnûk lêt turin hma a lâk dawn thu a sawi.

INC candidate Lalbiakzama hian nimin khan Returning Officer hnenah nomination paper a thehlut a; thuthar thehdarhtute zawhna chhángin, "Tuna India ram dinhmun, sakhua zalenna bo ta leh hnam hnufual leh tênau zawkte palzûtna tam ta lutuk hi kan auhla ber tur a ni," a ti.

MP inthlanah beiseina an neih san thu sawiin Lalbiakzama chuan, "Tunah hian central-ah INDIA hi lo sorkar ta se, MP-te lo ni ta ila, tuna BJP sorkarin min nêkchêpna leh min palzûtna tam tak hi hnûk lêt turin hma ka la ang," a ti a; an party dinna chu sakhaw zalenna leh intluktlanna a nih avangin chumi duhtute chuan amah an vote a rin thu a sawi.