Kan sakhua, ram leh hnam tan theihtawp kan chhuah ang - K Vena

Mizoram Lok Sabha inthlanpuia MNF candidate K Vanlalvena chuan, 'kan sakhua, ram leh hnam tan theihtawp kan chhuah ang' tih chu an campaign thupui ber a nih thu a sawi.

K Vanlalvena hian nimina Returning Officer hnena nomination paper a thehluh zawha thuthar thehdarhtute'n an kawm­naah, "Parliament chhung leh páwnah nasa taka au a ṭul avang leh chutianga au thei tur chuan party dang candidate-te aiin Mizoram mamawh chhànna kan ni dawn nia inhriain, kan sakhua, ram leh hnam tan theihtawp kan chhuah ang tih hi kan campaign thupui ber a ni," a ti.

K Vanlalvena chuan, MP atan thlan tlin a nih chuan NDA lamah a awm tur thu a sawi chuan, Mizo mipui vote-ah nghawng a neih a rin loh thu sawiin, "NDA hi party 45 inzawm khawm kan ni a, NDA-ah hian BJP duh lo burtu kan tam lutuk. NDA chhungah hian BJP thil ṭha lo tih hi páwn lam aṭanga do ai chuan a chhung aṭanga do hi a hlâwk zawk tih a taka hretu kan ni," a ti a; Rajya Sabha-ah theihtawp chhuaha Mizoram tan a lo au tawh avangin party dang candidate-te aiin mipuiin amah an thlan a rin thu a sawi bawk.