MKHC-in inthlan thuchah an tichhuak

Mizoram Kohhran Hruaitute Committee (MKHC) chuan nimin khan kumin April 19-a Mizorama Lok Sabha MP inthlan tur pualin inthlan thuchah an tichhuak a; an thuchah chu ngai pawimawha zâwm ṭheuh turin Mizoram mipui, kohhran leh political party-te an ngen.

MKHC chuan, inthlanpuiah zalen tak leh duh thlanna dik hmanga mi tinin vote an thlâk theih nan hel pawl leh ralthuam lam chi hman te, invau te, inbum te, sum semte ti lo turin political party-te leh mipui an ngen a; Lok Sabha inthlan tur pualin kohhran hrang hrangte chu kumin April 13/14-a kohhran inkhawmah ṭawngṭai rual turin an ngen nghal.

MKHC-in ṭawngṭai thupui tur an tarlante chu - inthlan tluang taka neih a nih theih nan leh Mizoram aiawhtu mi ṭha thlan chhuah a nih theih nan te, India ramah sakhaw zalenna ṭha tak a awm zel theih nan leh sakhaw hrang hrangte inrem taka an awm zel theih nan te, India ramah Kristiante rawngbawlna nêkchêpna leh harsatna siam zawnga hmalaknate a bo theih nante a ni.

MKHC INTHLAN THUCHAH
A. Mipui leh political party-te tan:
1. Zalen tak leh duh thlanna dik hmanga mi tinin vote an thlak theih nan hel pawl leh ralthuam lam chi hman, invau, inbum leh sum semte tih loh ni se.
2. Vote nei zawng zawngte'n kan mawhphurhna a nih ang taka vote thlak vek ni se.
3. Hnam bil zawng te, khawtlang inpumkhatna leh kohhran inunauna tichhe zawngtein eng pawl mahin hmalak loh ni se.
4. Mimal leh pawl insawichhiat vak vak te, tharum thawhna chawk tho zawnga inelsèn leh inauh nawmnahte tih loh ni se.
5. Therhlo leh sum ûma tu mahin vote hralh loh ni se.
6. Kan ram, kan hnam leh sakhaw himna ngai pawimawh tur mi thlan chhuah tum ni se.

B. Thlan tlinte chungchang:
1. Thlan tlin apiang chu MKHC chuan a mawhphurhna ṭha taka hlen chhuak thei turin duhsakna kan hlan. Thlangtu mipui leh roreltua ruattu Pathian zah chungin ram leh hnam tan hna thawk tur leh party aiawh chauh an ni tawh lo a, Mizoram mipui zawng zawng aiawha ding a nih inhre reng turin kan duh. Kan ram, kan hnam leh sakhaw himna ngai pawimawh reng turin kan beisei. Kohhran leh pawl duhsak bik nei lo a, angkhata an thu leh hla ngaih pawimawhsak tur leh kohhrante thawhpui theiha an awm kan duh bawk.
2. Thlangtu mipui pawhin thlan tlin apiang chu kan ram tana Pathian min pekah pawmin, sawisel ringawt loin i ṭawiawmin i ṭawngṭaipui zel ang u.