Sikul sak ṭhat leh thawm ṭhat dan chhui

NABARD sum hmanga sorkar sikul sak ṭhat leh thawm ṭhat danah sum tihchingpen a awm nia hriat a nih avangin, Mizoram Lokayukta chuan chhui chiang turin Anti Corruption Bureau (ACB) a hriattir.

NABARD sum hmanga sikul thawm ṭhat leh sak ṭhat chungchangah hian Lokayukta chuan kum hnih kal ta, February 25, 2022 khan zualkona thu a dawng tawh a, bawhzuiin School Education Director leh Finance Secretary chu ṭum thum lai thu a lo zawt fiah tawh. ACB-in preliminary inquiry a tih hnu leh hearing neih a nih hnuah February 13, 2024 khan chhui zui turin ACB a hriattir let ta a ni. Lokayukta hmalakna hi a lawmawm hle.

Mizoramah hian hna hrang hrang (infrastructure work) thawhnaah sum ruahman zat leh hnathawh inmil lo a lo awm fo tawh a, NABARD sum hmanga sikul sak ṭhat leh thawm ṭhat chungchangah pawh thil rinhlelhawm tak tak a awm thu sawi a lo ni tawh a, media lamah a lang tawh ṭhin.

Chuvangin, NABARD sum hmanga sikul sak leh thawm ṭhatte hi uluk tak leh fimkhur taka chhui zui ngei ni se. A chhuitu tur ACB lam pawhin hlauh nei loin, dik takin chhui se, khawi khawi emaw aṭanga nawrna leh thlêmnate an tawng palh thei a, chutiang hun a awm pawhin diknaah ding nghet tlat turin mipuiin kan beisei. Lokayukta leh ACB-ah Mizoram mipuiin beiseina sang tak an nei mek a ni.