Mizoram Pradesh Youth Cong­ress Committee (MPYCC) chuan thu­chhuah siamin, minister of state Robert Romawia Royte chu deputy chief minister-ah chief minister Zoramthanga'n dah law law se an duh thu an tarlang.

Congress ṭhalai chuan, MNF sorkarah cabinet minister senior tak takte aiin minister of state Robert Romawia Royte chu CM Zoramthanga lakah a tlatlum zawk nia sawiin, "CM Pu Zoramthanga leh Dr R Lalthang­liana inkar thlengin a inrawlh hreh loh bakah, cabinet minister dangte tel phâk lohna thlengin CM kiangah a tel ṭhin a ni," an ti.

Chief Minister chan Finance department thupek anga Dr R Lalthangliana enkawl Health department sum hman dan Accounts & Treasuries-a Special Audit Team-in hriattir lâwk loa an endik (audit) chu CM leh Health Minister inkar ṭha loin a hrin chhuah ni ngeia an ngaih thu MPYCC chuan an sawi.

MPYCC chuan Health department audit chungchangah cabinet minister-te an ngawih ṭhap laiin Robert Romawia'n CM thlavang hauhin, 'Accounts & Treasuries-in a tih tur dik tak tiin, Health department chu a endikpui mai a ni,' tiin a sawi tih an tarlang a, "CM Pu Zoramthanga hian a aiawha ṭawng chhuak turin deputy CM leh cabinet minister dangte aiin Pu Robert Romawia a ring zawk tih a tichiang hle a ni," an ti.

MPCC tarlan danin, June 26, 2020-a CM Zoramthanga hoa Smart City hmalaknaa Aizawl tihchangtlunna tura project ṭhenkhat thlirhonaah CM, Dy CM, official ṭhenkhatte bakah, Smart City chungchanga pawimawhna nei lo Sports Minister an tel a; cabinet minister senior dangte an tel lo.

Thil awm dan thlirin, CM-in minis­ter dang zawng zawng aiin Robert Romawia chu a ring zawk a, a aiawha ṭawng chhuak tur leh project khawihtu atan a duh tih a chianga an hriat thu sawiin MPCC chuan, "Cabinet minister aia minister of state dah pawimawh zawk reng ai chuan Pu Robert Romawia hi cabinet minister-ah hlángkai law law se, minister dangte thîk phâk loh turin Pu Tawnluia aiah Dy. CM-ah dah law law se, protocol a buai lo zawkin kan ring," an ti.

Share this Post