Vanglaini - Assam mite'n Mizoramah Dawr an siam thu CM hrilh

KHAWTHLIR

IAS sîksawi

Mizoram sorkarchuan tun hnai khan IAS pathum a sîksawi. Serchhip DC Dr Lalzirmawia Chhangte chu secretary atan ruat a ni a, Printing & Stationery leh Fisheries department a chang ang. Siaha DC Bhupesh Chaudhary chu additional secretary atan ruat niin, Cooperation department a chang ang a, Aizawl additional DC Kumar Abhishek chu Serchhip DC a ni ang.

Mi pali dah lut

Covid-19 vei rinhlelh thilah nimin khan State Referral Hospital-ah mi pali dah luh thar a ni a, an zinga pahnih chu nimin khan swab sample laka endik nghal a ni a, he thu ziah lai hian result a la chhuak lo. Mi dang pahnih chu vawiinah endik an ni ang. SRH-ah hian Covid-19 vei mi 15 enkawl mek a ni a, Makeshift ICU-ah mi pakhat awmin, mi dang 14-te Isolation Ward-ah an awm.

Lungleiah Swab test

June 28, Pathianni khan Lunglei Civil Hospital laboratory-ah Truenat khawl hmangin swab sample 30 endik a ni a, June 27-ah sample 31 endik a ni bawk a; endik zawng zawngte'n Covid-19 an kai lo tih finfiah a nih thu sorkar thuchhuah chuan a tarlang. LCH laboratory-ah hian Pathianni thleng khan sample 299 endik a ni tawh a, sample pahnih chu Covid-19 positive angin a hmu a, ZMC-a endik nawnnaah positive pakhat zawk chu negative a ni tih hmuh a ni thung.

Hnathawh enfiah

Kolasib bialtu MLA K Lalrinliana chuan nimin khan a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. K Lalrinliana chuan bial chhung mipuite chu MLA fund an ta a ni tih hria a, fund hmanga hnathawhte ngaihven a, enpui fo turin a chah.

DAWNTISEI

Assam mite'n Mizoramah Dawr an siam thu CM hrilh

Mizo Students Union (MSU) chuan nimin khan chief minister Zoramthanga a pisaah an kâwm a, Assam mite'n Vairengte dáia Mizoram chhungah dawr an siam thu an hrilh.

MSU chuan, Chief Minister hnenah hian tun hnaiah Assam lamin Mizoram chhungah dâwr an siam tih a hmunah an finfiah thu sawiin, state dang lakah Mizoram chàn zel a nih loh nan ramria duty-te thuam chak turin an ngen a ni.

Covid-19 vanga state páwn aṭanga lo haw turte haw theih hun chhung siam turin MSU chuan CM an ngen a, "State páwn aṭanga lo hawte vanga mirethei zawkte hna thawk thei loa an awm reng ṭha kan ti lo. Ni tin eichawp zawnga inhlawhfa ṭhinte'n hna an thawh theih nan ruahmanna ṭha zawk siam turin CM kan ngen a ni," an ti.

MSU chuan, an thu thlente a ṭul anga bawhzui leh tihhlawhtlin a nih tur thu Chief Minister-in a sawi avanga an lawm thu thuchhuah siamin an tarlang.

Share this Post

Login to comment

No Comments