Manipur : ITLF-in Kuki-Zo hnamte LS inthlan chuh ve lo turin hriattir

Manipur-a tribal pawl, Indigenous Tribal Leaders Forum (ITLF) chuan Kuki-Zo hnam mi leh sate chu Lok Sabha inthlan lo awm tur chuh tuma an hming pe lut ve lo turin a hriattir. He thuthlukna hi inlungrual taka an siam a nih thu an sawi.

Manipur-ah hian Lok Sabha inthlan atan hian vawi hnih vote thlak a ni dawn a, a vawi khatna hi April 19-ah neih tur niin, a vawi hnihna chu April 26-ah neih a ni bawk ang. Lok Sabha seat pahnih inchuh tur awmin, seat pakhat chu tribal tana hauh bik seat a ni bawk. ITLF thuchhuah hian Kuki-Zo hnam zinga mite chu tribal tana hauh bik seat emaw general seat emaw pawh an chuh ve a remti lo a ni.

Inthlan chuh ve lo tura hriattirna ITLF-in an chhuah hi chairman Pagin Haokip leh secretary Muan Tombing-te chuan an hming an ziah hnan a, an hnam dinhmunin a zir loh vang a nih thu an sawi. ITLF hriattirna chhuah hian Kuki-Zo hnamte chu inthlan neih hunah vote thlak vek turin a chah thung a, Outer Manipur MP seat chuh ve lo turin hriattirna tichhuak mah se vote erawh thlak vek turin an mi leh sate chu an ngen.

Kuki Inpi Manipur (KIM) erawh chuan inthlan lo awm turah chuh ve an tum nia sawi a ni thung. Outer Manipur seat leh Inner Manipur seat chuh tura hming theh luh theih hun chhung hi March 27 thleng a ni a, hun tiam a zawh hmain an mi leh sa zinga mite chuan hming an theh luh ngei a rinawm hle.