Nimina chief minis­ter Zoramthanga hoa Assembly Annexe con­ference hall-a sorkar hotute leh pawl hrang hrang aiawhte ṭhukhawm chuan, July 1, 2020 aṭang­in ném deuh zawka inkhàrkhip an rél.

Nimina inràwn khawm­naah hian spea­ker Lalrinliana Sailo, Health minister Dr R Lalthangliana, Disaster Management & Reha­bili-tation (DMR) minister Lalchamliana, IPR minister Lal­-ruatkima, chief secretary Lalnunmawia Chuaungho leh sorkar official dangte an tel a; Mizoram Kohhran Hruaitu Committee, NGO Coordination Committee, Aizawl City Local Council Association, All Mizoram Village Council Association leh Indian Medical Association aiawhte an tel a ni.

Chief Minister chuan, Covid-19 chuan nunphung pangngai a tikhaihlak a, hun rei tak inkhàrkhip a nih tawh thu sawiin, "Vanneihthlak takin hma kan sawn zel niin a lang. Kan rua­hmannate hi zaa zaa fel famkim ni lo mah se, a tlangpui chuan mi ram nen khaikhin chuan Mizoram chu entawntlakah min ngai. Heng hi kan thawhhona a ṭhat vang a ni," a ti.

Mizoramah hriléng dinhmun zia­awm chho ve zel mah se, India ram pumah chuan a chîm sàn hun a la thleng dawn chauh tia sawi a nih thu sawiin Zoramthanga chuan, "Fimkhur taka kan awm mek hi kan inthlah nghal vek a fuh lo ang," a ti a; ram economy leh ni tin nun dan tibuai lutuk si lo, him thei ang ber sia kal dan thiam a ngaih tur thu a sawi.

Health & Family Welfate minister Dr R Lalthangliana chuan, Covid-19 donaah mipui leh sorkar thawhhona rah ṭha Mizoramin a hmu tih sawiin, "Post-lockdown kalpui dan tur uluk taka ngaihtuah a, a zâwmtu turte pawhin theihtawp kan chhuah tlân a ngai," a ti.

USA aṭanga RT-PCR kháwl beisei mek a nih thu sawiin Dr R Lalthang­liana chuan, "Tun hriléng vang hian tlawm­ngaite leh sorkar hnathawktute an fakawm hle. Kawng hrang hrangah chanchin lawm­awm kan hre zel a ni," a ti a; Covid-19 dedicated hospital ZMC-ah damlo 160 dah theihna tura ruahman a nih laiin, Covid-19 vei an awm tam lai berin 70 an tling lo a, vanneihna a nih thu a sawi.

DMR leh Home changtu minister Lalchamliana chuan, ném zawka inkhàrkhip duhna rilru mipuiin an pu hlawm tih sawiin, "Kan dinhmun enin a àwm viau a ni. Chutih rual chuan, social distancing hi kan ngaih pawimawh leh zual a ṭul," a ti.

Chief Secretary tarlan danin, Mizoramah state páwn aṭangin tangkhang mi sing khat chuang hruai haw a ni tawh. Hruai hawte zinga 55% chu sorkar quarantine facilty-ah an awm a, 25% chu kohhran leh khawtlang buatsaihah awmin, a bak zawng chu mahni in leh hotel-ah khung hran an ni. Khung hrante zinga 92% chu sorkarin an ei leh in a tumsak a, 8% chu kohhran, khawtlang leh mahni intum an ni.

Share this Post