Covid-19 vangin kum 2020-21 academic session ṭan hun tura bitukah ṭan theih a ni lo a, hei vang hian zirlaibu pumpui zir zawh hman a ni dawn lo. Zirlaite'n an zir chin tur zirchiangtu tur din a ni.

Vanglaini palai zawhna chhangin School Education minister Lalchhandama Ralte chuan, Covid-19 vanga hun bituka sikul kai ṭan theih a nih loh avangin zirlaite'n an zir chin tur zirchiangtu tur din a nih thu a sawi a, "Zirlaite'n an thiam tur ang an thiam loh phah lohna turin rua­hmanna siam kan tum. Chapter pumpuia zir lo tawp tawp loin, a pawimawh lai leh ṭangkai tur lai chu zirlaite'n an zir theih dan tur kan zawng a ni," a ti.

Lalchhandama Ralte chuan, department lam chuan July 15, 2020 chu sikul ṭan hun tura an bituk a la nih thu sawiin, "Sikul ṭan hun tura ruahman hi State Task Force hnenah kan thlen tawh. Anni hian boruak azirin July 15-ah sikul ṭan pawi tawh loa an hriat chuan ṭan a ni ang a, a la hun loa an hriat chuan a ṭan theih dawn loh," a ti a; department lamin July 15 ruahman mah se, ṭan ngei tur tihna a ni lo tih a sawi.

Tarlan tawh angin, Education minister Lal­chhandama Ralte hoa June 3-a department ho­tute leh zirna kaih­hnawih páwl hrang hrang aiawhte ṭhukhawm chuan kum 2020-21 academic session atan July 15, 2020-ah sikul kai ṭan an rél a ni.

Share this Post