KHAWTHLIR

Chawimawina hlan

Lawngtlai District MJA chuan nizan khan MJA member, MLA atana thlan tlin Home minister K Sapdanga chu a chenna in Aizawl Venglaiah chawimawina thuziak an hlan. Lawngtlai District MJA hian MJA member kawng hrang hranga hlawhtlinna changte chawimawina an hlan ṭhin a, K Sapdanga hi MJA president hlui niin, tunah hian prominent journalist a ni mek.

Nomination thehluh hun a tawp dawn

April 19, 2024-a Lok Sabha MP inthlan lo awm tur atana nomination thehluh hun chu vawiin hian a tawp dawn a, hriat theih chinah mi pahnihin an thehlut tawh. Nomination lutte chu naktuk hian endik a ni dawn a, inhnukdawk duh tan March 30 thleng hun hawn a ni ang.

Lawmpuina hlan

March 25, Thawhṭanni zan khan Mizoram Ex-services League (MESL) headquarters chuan an hruaitu MLA atana thlan thar lawmpuina an hlan. MLA inthlan neih zawh takah khan MESL president Lt. Col. Clement Lalhmingthanga leh executive committee member TBC Lalven­chhungate chu thlan tlin an ni.

Dry day

Election Commission of India kaihhruaina leh Mizoram Liquor (Prohibition) Rules, 2022-in thuneihna a pek angin Excise Commissioner chuan April 19, 2024-a Lok Sabha inthlanpui lo awm turah inthlanna dik leh felfai neih a nih theihna turin April 17 tlai dar 5 aṭanga April 19 tlai dar 5 thleng leh vote chhiar ni June 4, 2024 chu zu hralh phal lohna ni (dry day) atan a puang. Dry day puan a nih chhung hian Mizoram chhunga military canteen aṭanga zu hralh leh lei bakah zu in khap tlat a ni.

Resolution pawm

Mizo National Youth Front (MNYF) extended meeting nimina neih chuan resolution pahnih pawmin, MNF office bearer atana thlan tharte an rintawk thu leh Lok Sabha inthlan atana an party candidate K Vanalvena an chhuan thu leh tling tura an duh thu an tarlang.