Covid-19 vei tawh lo 118 an awm Dam tawh mi 61 an chhuak tawh

Covid-19 hripui vei zinga mi paruk chu an dam tawh avangin nimin khan anmahni enkawlna hmun aṭangin chhuahtir an ni. Hripui vei dam tawh chhuahtir tawh zawng zawng chu mi 61 an ni a, Covid-19 vei tawh lo, la chhuahtir si loh mi 57 nen vei tawh lo (negative leh tawh) zawng zawng chu mi 118 (78.14%) an ni. Hripui la vei mek mi 33 an awm.

Sorkar thuchhuah tarlan danin, nimin chawhma dar 11:20 khan Covid-19 vei dam tawh hmeichhe pakhat chu Champhaia Dedicated Covid Health Centre (DCHC) aṭangin chhuahtir a ni. Chhunah State Referral Hospital (ZMC)-a enkawl zinga mi pangate pawh an dam tawh avangin chhuahtir an ni bawk a; anni hi Aizawl district mi vek niin, mipa pali leh hmeichhia pakhat an ni.

Covid-19 vei dam tawh, SRH-ZMC, DCHC leh Covid Care Centre (CCC) aṭanga chhuahtir tawh zawng zawng chu mi 61 an ni a, chu chu vei tawh zat 151 aṭangin 40.40% a tling. Chhuahtir tawhte chu - Aizawl district mi 24, Kolasib district mi 10, Siaha district mi 8, Lawngtlai district mi 8, Champhai district mi 5, Saitual district mi 3, Serchhip, Mamit, Khawzawl district mi pakhat ṭheuh an ni. 

Covid-19 vei hnua vei tawh lo (negative) tih finfiah tawh mi 57 chu an district-a DCHC leh CCC-ahte la awmtir niin, an la chhuak lo a; chu'ngte chu - Lunglei district mi 46, Serchhip district mi pahnih leh Mamit district mi pakua an ni. 

Hetih lai hian, SRH-ZMC aṭanga chhuahtir tawh zinga pakhat, Serchhip district mi chu Serchhipa CCC-ah la awmtir leh rih a ni a, chutih rualin, chhuahtir (discharge) tawha chhiar a ni thung. Siaha district-a chhuahtir tawh mi pariat zinga pali, chhungkaw pakhata mite pawh chhuahtir ni tawh mah se, an duh dan leh sorkar thuneitute remtihna angin DCHC/CCC-ah an la awm rih bawk.

Serchhip DC Dr Lalzirmawia Chhangte chuan, an district-a enkawl mi pahnih, negative tawhte chu endik nawn leh turin nimin khan an swab sample lak a nih thu a sawi a, "An negative nawn chuan chhuahtir nghal tur a ni," a ti.

Mizorama district 11 zingah tun thlengin Hnahthial district-ah Covid-19 vei hmuh chhuah an la awm lo a; district dang pathum - Serchhip, Lawngtlai leh Saitual district-a hripui vei hmuh chhuahte'n an vei tawh lo vek tih finfiah a ni tawh bawk.

Covid-19: Mizoram dinhmun

(June 29, 2020)

DistrictPositivePositiveNegative

tawh zatmek zatleh tawh

Aizawl381424

Lunglei47146

Siaha918

Champhai945

Kolasib11110

Serchhip3-3

Lawngtlai8-8

Mamit201010

Saitual3-3

Khawzawl221

HnahthialNil--

Total15133118






Share this Post

Login to comment
No Comments