Solar plant atana VC hnena ram dilna CESJ-in hnûk kîr turin PE dept. ngen
Centre for Environment and Social Justice (CESJ) chuan solar plant atana village council (VC)-te hnena ram an dilna hnûk kîr turin Power & Electricity department an ngen.
CESJ chuan, Mizorama solar power dinhmun ngun taka an zir thu tarlangin, "Mizoram khaw hrang hranga VC-te hnena an ram chhunga solar plant hmun tur dilna lehkha February 19, 2024 an tih chhuah tawh chu a rang lama hnûk kîr turin PE department kan ngen," an ti.
Public private partnership (PPP) mode-a solar power siam chhuah a, power purchase agreement ziah belh chu kawlphethaa Mizoram intodelhna kalkawng pawimawh ber ni loa an hriat thu tarlangin CESJ chuan, "PPP mode-a power kan siam chhuahna leh siam tumna hmun hrang hrang - Vankal, Tlungvel, Keifang, North Vanlaiphai, Thenzawlte leh hmalakna tura agreement awm sate hi enfel hmasak kan duh," an ti a; solar power chu chhûn lamah chauh hman theih a nih avangin zan lamah phai aṭangin kawlphetha lak reng a ngai tho niin an sawi.
CESJ tarlan danin, PPP mode-a kawlphetha siam chhuah a, sorkarin a lei lêt leh tura inremna siam chu a man a sang. Kawlphetha siam chhuah aṭangin unit khat Rs 4/5-in an lei a, chu ai chuan India Power Market (Indian Energy Exchange Limited)-ah a man ngai emaw, tláwm zawka leiin environment humhalhna a ni nghal dawn. VC-te hnena ram dil a, solar energy siam chhuah belh chu state sorkar ta a nih chuan a ṭha a, power unit khat Rs 2 vela lei ang a ni thei. PPP mode-a siam chhuah a nih erawh chuan state-in a lei lêtnaah sorkar a insen viau tho a ngai a ni.