World Water Day hman a ni

Nimin March 22 kha World Water Day a ni a, thupui chu 'Inrem nan tui (Water for peace)' tih niin, Mizoram hmun hrang hrangah hman a ni. Aizawlah chuan Central YMA leh PHE depart­ment buatsaihin Vanapa Hall-ah hman a ni a, PHE secretary Lalhmingliani Hmar-in a hmanpui.

Lalhmingliani chuan, tui chu mi tin mamawh a nih angin, châk­khai atana hmanna chi hrang hrangah khaw­vel changkang zelin mamawhna a titam ve zel tih a sawi a, "Tui duh­khawp hman tur kan nei lo chho ṭan dawna a lan avang hian kan hmanna hrang hrangah innghir­nghona awm thei laka ta inhriatthiamna nen inrem taka kan awm tlàn a ngai," a ti.

Inkhawm hi PHE engineer-in-chief F Liantluanga'n kaihruaiin, CYMA president Lalhma-chhuana pawhin thu a sawi a; PHE chief engineer Lalrothanga'n thupui a sawi.

World Water Day hmannaah hian tuihna humhalhnaa mimal thawk ṭha pali - C Lalngaihsaki, Ṭhaizawl (Lunglei dis­trict), H Lalramnghaka, Làmchhip (Aizawl district), R Lallianzela, Kepràn (Aizawl district) leh Pachhunga, Ṭhiak (Aizawl district)-te hnenah chawimawina hlan a ni.

Mizoram pum huapa WATSAN committee thawk ṭha thlan nghal a ni a, Mizoram pumah Mual­ṭhuam North WATSAN Committee pakhat­na an ni. Chhuanthar Tlangnuam WATSAN Committee pahnihna an ni a, pathumna chu Buarpui WATSAN Committee leh Vanchengte WATSAN Committee an ni.

World Water Day pual hian zing karah Aizawl Thunder-te nen ṭanghoin khawpui chhungah kawng­zawh/rally huaihawt a ni a; mipui náwlpui tan intih­siakna hrang hrang - a huhoa hnawmhnawk thiana intihsiakna social media challenge, painting competition, one page comic design, jingle making Ieh SMS slogan writing-te buatsaih a ni tawh bawk.

United Nations General Assembly chuan khawvelah tui duhkhawp leh thianghlim a awm zel theih nan leh tui awm sate venhim a, awmze nei taka hman a ṭulzia inzirtirna leh khawvel mipui an thawhho theihna turin kum 1992 khan March 22 chu World Water Day atan a puang. Kum 1993-ah hman ṭan a ni a, Mizoramah chuan kum 2012-ah hman ṭan a ni.