Mizoramah jail táng 2,050 an awm; táng awm thei zat aiin 664-in an tam

Mizorama jail hrang hrangah nimin zing thleng khan táng mi 2,050 an awm a; Mizoram jail-a táng thei zat tura bituk chu mi 1,386 niin, awm thei zat bituk aiin 664-in an tam zawk mek.

Mizoramah jail 10 a awm a, táng tamna ber Central Jail, Aizawlah chuan táng thei zat tura bituk mi 438 a nih laiin, mi 940 an táng mek. Tâng mek tlemna ber Lawngtlai District Jail-ah mi 47 an táng mek a, táng thei zat tura bituk chu 98 niin, táng thei zat bituk zatve an tling lo.

Mizoramah hmeichhe tan bika din jail pakhat - Central Women Jail, Aizawl a awm a, mi 243 an táng mek. Women Jail hi mi 96 tàn theihna tura ruahman a ni a, jail-a awm mek zinga 33 chu an nute an tàn vanga jail-a awm ve naupang an ni.

Nimin zing lam dinhmun anga jail-a táng mek mi 2,050 zinga 1,702 chu mipa niin, mi 315 chu hmeichhia an ni a, mi 28 chu naupang an ni. Táng zinga 56 chu dam chhunga táng tura an chungthu rêl tawh an ni a, mi 415 chu hrehawm taka táng tura hrem (rigorous imprisonment) niin, mi 275 chu simple imprisonment an ni thung.

Táng zinga a tam zawk, mi 1,271 chu an chungthu ngaihtuah mek (under trial prison) an ni bawk.

Mizorama jail ṭhenkhatah táng tur zat bituk aia tam táng an awm laiin, ṭhenkhatah chuan táng tura bituk aia tlem tâng an awm a; hei vang hian Prison department chuan a remchan angin jail tángte an sawn kual ṭhin a, jail tâwt deuha mite chu a thâwl deuhah an sawn ṭhin a ni.