MCS officer pakhat lakah Ainawn Veng khawtlang an lungawi lo

Ainawn Veng Local Council, YMA, MUP leh MHIP chuan thuchhuah inṭâwm siamin, an veng mi Daniel Sailo, MCS chêt danah an lungawi loh thu leh, an veng khua leh tuia an pawm theih loh thu an tarlang.

Ainawn Veng khaw­tlang thuchhuah tarlan danin, Daniel Sailo hian tun hnaiah Ainawn Vengah in a lei a, August 2023 aṭang khan Ainawn Vengah an awm. Ainawn Veng LC leh YMA hruaitute'n ṭum eng emaw zat pém lehkha an dil tawh a; mahse, pém lehkha neih ṭul a tih loh thu te, YMA chu engah mah a ngaih loh thute a sawi bakah, an awmna YMA section hruaitute pawh vawi tam hmusit leh chapo takin a ṭawng khum tawh.

Daniel Sailo te hian March 14, 2024 zanah an in kawtah lei laiin, a paihna tur hmun ni loah leivûng an paih. LC-in an hriat veleh leivûng paih chhan zawt tur leh paihna hmun ni loah an paih tih hrilh turin YMA section hruaitu pahnih an tír a, Daniel Sailo chu a mut tawh avangin a nupuiin a lo dawngsawng.

A hnuah LC-te nen phone hmangin an indawr zui a, ṭha takin an inthlah nia an ngaih laiin a tûk (March 15) tlai lamah Daniel Sailo chuan YMA section hruaitute chu an inah kal chilhin, darkar khat chhunga ngaihdam an dil lo a nih chuan FIR thehluh khumah a vau a, kutthlak duh hial khawpin a che zui bawk.

Ainawn Veng LC leh YMA hruaitute chuan thil awmzia sawipui tur leh hrilhfiah ngaite hrilhfiah turin March 15 zanah Daniel Sailo inah an lèn thu tarlangin, "Khawtlang hruaitute hi chapo leh hmusit taka lo dawngsawngin, Ainawn Veng a hmuhsit thu leh engah mah a ngaih loh thu te, Ainawn Venga lu nghah a duh loh thu te, chenna tlaka a ngaih loh thute a lo hrilh a, ṭawngkam chhia hrang hrangin khawtlang hruaitute a lo ṭawngkhum a ni," an ti.

Daniel Sailo chuan March 16-ah Zonuam Police Out Post-ah khawtlang hruaitute lakah FIR a thehluh zui thu tarlangin Ainawn Veng LC leh NGO chuan, "A nun dan leh chêt duh dan enin ṭhenawm khawveng, upa leh tar chak lo, nunaute tan pawh a him tawk loah kan ngai," an ti a, Daniel Sailo chu Ainawn Veng khua leh tuiah leh an mi leh saah an ngaih theih loh thu an tarlang.