Naupang thih dana lungawi loin Ruallung mipuiin kawng an zawh

Ruallung khaw mipuite chu an khaw naupang Lalfakzuala (12) s/o T Lalchhuanmawia, LRM Hospital-a March 13, 2024-a a thih danah lungawi loin nimin khan an khuaah kawng an zawh a, khaw mipui ṭhahnem tak an tel.

Lalfakzuala thih dana lungawi loh vanga Ruallung khuaa kawng­zawh hi Ruallung VC leh tlawmngai pawlte an ni a; thuchhuah siamin nghalin, "Lalfakzuala thih chhan nia an sawi hi pawm har kan tiin hriat­thiam har kan ti tak zet. En liam mai mai kan tum lo a, kan beisei ang hmalakna kan hmu lo a nih chuan a ṭul angin hma kan la zel dawn," an ti.

Ruallung khawtlang thuchhuah tarlan danin, Lalfakzuala hi March 11, 2024 khan a nu leh pate'n Aizawlah hruaiin an inentir a, ENT doctor-in a tonsil zai a ngaih thu a lo hrilh. March 12-ah LRM Hospital-ah doctor an ráwn leh a, March 13-ah zai turin an lo ruahman a ni. A taksa hmun dangah dam lohna leh harsatna a neih an hre lo.

March 13 chawhma dar 10-ah LRM Hospital-ah admit a ni a, chawhnu dar 3:24-ah inzaina pindan (operation theatre)-ah nawr luh a ni a, tlai dar 4:37-ah a dinhmun a ṭhat loh thu leh awmzia a awm tawh loh thu a chhungte hrilh an ni. Zan dar 6:34-ah ICU-ah dah luh a ni a, a thih thu dar 6:45-ah a nu leh pate hnenah hrilh a ni.

Ruallung VC leh NGO-te chuan, Lalfakzuala thih chhanah malignant hyperthermia (hnimhlum zo lo) a nih thu sawi a ni tih tarlangin, "A thih chhan nia an sawi hi pawm har kan tiin, hriatthiam har kan ti tak zet," an ti.