Tuikual S-in an veng nu thihna an dem

Tuikual South Local Council leh an venga tlawmngai pawl hrang hrangte chuan thuchhuah inṭawm siamin, an veng nu V Lalhmingthangi w/o C Zothanmawia mi kut tuara a thi chu pawi an tih thu leh tualthattu chu a phú tâwka hrem ngei ni se an duh thu an tarlang.

Tuikual South LC leh NGO-te chuan, "V Lalhmingthangi 16.03.2024 (Inrinni) zana Aizawl New Market-a ama dawr kudam ngeia misual kut tuara râwng taka thah a ni hi pawi kan tiin, a kalsan tâk a pasal fanaute kan tawrhpui tak zet. Nunna hlu tak chàn phaha a chunga kutthlaktu hi Tuikual South khawtlang mipui chuan kan dem tak zet a, a rang thei ang bera man chhuaha a phu tâwk hremna pek ngei ni se kan ti," an ti.

Chak taka hma latu police te, chhiattawhna hmuna a ṭul anga buaipuitu Chhinga Veng leh Dawrpui LC leh YMA-te fakawm an tih thu leh an chungah an lawm thu an tarlang a, "Pawi khawihtu man chhuahna kawnga Police-te hmalakna kan fak tak zet. Chiang taka thu dik hai lan a nih thuai theihna turin police-te hmalakna a theih anga ṭawiawm turin khawtlang mipui kan inngen a, hmalakna tiṭhuanawp zawnga hma la lo turin kan inngen bawk," an ti. Social media-ah thu hriat apiang tidarh lo turin mi tin an ngen bawk.