Changpât chi thar hmuh chhuah a ni

Pachhunga University College-a Zoology department-a research tite chuan tun hnai khan Khawrihnimah changpât chi thar, khawvel hmun danga la hmelhriat ngai loh an hmu chhuak a; an hmuh chhuahna hmun hming chawiin Eutyphoeus rihnimensis tiin a hming an vuah.

Changpât Eutyphoeus rihnimensis ang hi kum 2017 khan Khawrihnim khuaah hmuh ṭan a ni a, kum 2021-ah Mamit leh Dâmpui khuaahte hmuh leh a ni.

Eutyphoeus rihnim­ensis hi a anpui Euty­pho­eus changpâtte nen ngun taka zira khai­khin a nih hnuah a dang­lamna hmuh chhuah a ni a; a pian­hmang leh kaw­chhung lam leh, DNA chiang zawka zir a nih hnuin a dang­lamna hmuh a ni.

A chanchin ziahna chu journal-ah mithiamte endik tura thawn a ni a, changpât chi thar ngei a ni tih finfiah a nih hnuah March 13, 2024 khan New Zealand aṭangin Zootaxa Journal-ah tihchhuah a ni.

Changpat chi thar E rihnimensis hi a anpui changpat dangte laka a danglamna langsar ber chu - a taksa hma lam hnuai lama a pa serh chu kut zungṭang pali angin a chawr chhuak chu a ni a; a DNA barcode aṭang pawhin chiang takin a hmaa changpat hriat tawhte lak aṭangin a danglam tih an hmu bawk.

E rihnimensis changpâtte chu leiah centimetre 15-30 vela thûkah an awm tlangpui a, a puitling chu pencil tiat vel niin, milimetre 105-149 vela sei an ni hlawm. A rawng chu sen uk rawng kai a ni a, hnim ṭawih ei chi niin, fûr tàwp lamah an vâk chhuak nasa zual ṭhin.

PUC Zoology department hian kum 2005 khan changpât chikhat, Eutyphoeus mizoramensis an lo hmu chhuak tawh bawk. PUC principal Prof. H Lalthanzara leh a thawhpuite chuan, Mizoramah changpât chi hrang ṭhahnem tak a awm thu leh an la zir mek thu a sawi.