Mizoram MP thlan hun - April 19, 2024; CEO-in vote thlâk vek turin voter a sáwm

Chief election commissioner (CEC) Rajiv Kumar chuan March 16, Inrinni khan Delhi-ah press conference neiin, Lok Sabha General Election neih hun tur a puang a; Mizoramah chuan inthlan thawh khatna, April 19, 2024-ah vote thlâk a ni dawn. CEO chuan, vote thlâk vek turin vote nei zawng zawngte a sáwm.

Election Commission of India (ECI)-in a ruahman dan chuan, Mizorama Lok Sabha inthlan turah hian March 20-ah notification chhuah a ni dawn a, inthlan chuh tum (candidate)-te tan March 27 thleng hming pek luh theih niin, nomination-te chu March 28-ah endik a ni ang.

Nomination thehlut tawh, inhnûkdâwk duhte tan March 30, Inrinni thleng hun hawn a ni dawn a, parliamentary constituency no. 1 - Mizoramah chuan April 19 (Zirtawpni)-ah vote thlak a ni ang. Inthlan hi thawh sariha neih a ni dawn a, vote thlâk thawh sarihna chu June 1-ah neih tur a ni. June 4-ah India ram pumah a ruala vote chhiar tur a ni a, MP inthlan kaihhnawih thilte chu June 6, 2024-ah zawh vek tura ruahman a ni.

Mizoram chief electoral officer Madhup Vyas pawhin March 16, Inrinni tlaiah khan IPR Auditorium-ah press conference nei ve nghalin, Lok Sabha inthlan atana inbuatsaih dante a puang a; Mizorama vote nei zawng zawngte chu vote thlak vek turin a sáwm.

Madhup Vyas chuan, Lok Sabha inthlanpui chu thianghlim, fel, zalên, mi tin huap leh telna a nih ngei theih nan Mizoram mipui ṭawiawmna a ngen a; inthlan chhunga chêt velna hrang hrangah ṭha taka ṭawiawm turin media lama thawkte a ngen bawk.

Kum 2019-a Lok Sabha inthlanah khan Mizoramah vote 63.13% a tla a, India ram puma vote tla percentage aiin a hniam tih sawiin CEO chuan, "Kum 2019-a vote tla zat hi kuminah khûm a nih ngei theih nan vote tlak tlêm ṭhinna hmunah te, a mi cheng vil zual ngaihna hmunahte Systematic Voters’ Education and Electoral Participation (SVEEP)hmangin hmalak zel a ni," a ti a; inthlana mawhphurhna neite'n ṭan an lak mek thu a sawi.

CEO chuan, inthlan puan a nih aṭangin Model Code of Conduct (MCC) hman nghal a nih thu sawiin, "MCC hi Mizoram pumah hman niin, candidate te, political party-te leh sorkar hnuaia awm zawng zawngin an zâwm tur a ni a, MCC bawhchhiatna reng reng ûm zui zat zat a ni ang. MCC-in a huam tel chin chuan MCC chungchanga thuchhuahte an chhiarin an hre bel hle tur a nih bakah, an zâwm ngei tur a ni," a ti.

Mizoram CEO sawi danin, MP inthlanah hian Mizoram electoral roll thar February 8, 2024-a tlangzarh tâk hman a ni dawn. Electoral roll thar berah voter 8,61,277 an awm a, mipa 4,14,777, hmeichhia 4,41,520 leh service voter 4,980 an ni.

Vote thlâkna atan ECIL siam electronic voting machine (EVM) / voter verifiable paper audit trial (VVPAT) model thar ber M3 hman a ni dawn a, khawl hman turte chu ECI-in a rawn dah tawh. Khawl endik thawh khatna zawh a ni tawh a, ballot unit 2,158, control unit 2,195 leh VVPAT 2,288-te chu district tina strong room-ah dahṭhat a ni.

Kum upa (senior citizen) kum 85 chin chung lamte leh rualbanlo (persons with disabilities)-te tan mahni in lamah postal ballot hmangin vote thlak theih a ni dawn a, mahni ina vote thlak duhte tan mahni bialtu BLO kaltlangin dil theih a ni.

Inthlana venhimna hna thawk turin state police mi 3,000 chuang bakah, Central Armed Police Forces (CAPF) company 15 hman tum a ni.

LOK SABHA INTHLAN TURA MIZORAM DINHMUN

1. January 1, 2024-a kum 18 tling chin behchhana Mizoram electoral roll thar, February 8, 2024-a tlangzarh tâk hman a ni dawn.

2. Electoral roll thar berah voter 8,61,277 an awm a, mipa 4,14,777, hmeichhia 4,41,520 leh service voter 4,980 an ni.

3. Voter tamna ber district - Aizawl (2,88,268)

4. Voter tlemna ber district - Hnahthial (16,257)

5. Voter tamna ber constituency - Tuichawng (36,493)

6. Voter tlemna ber constituency - Thorang (15,152)

7. Mipa hmeichhia voter ration 1,000:1,064

8. Young voter zat (kum 18-19 inkar) - 36,214

9. Senior citizen zat (kum 85+) - 4,758

10. Rualbanlo voter zat - 3,399 (M - 1,877; H - 1,522)

11. Polling station zat - 1,276 (urban - 525; rural - 751)

12. 2019 inthlana PS - 1,175 (urban - 454; rural - 721)

13. PS punna zat - 101 (urban - 71; rural - 30)

14. PS tinah Assured Minimum Facilities dah vek a ni dawn.

15. Assembly constituency tinah hmeichhe hlangin an vil leh rualbanlote'n an enkawl PS pakhat siam tum a ni.

16. Assembly constituency tinah tualchhuak thil hmanga siam leh hnam zia tilang thei tura chei model PS pakhat tal a awm ang.

17. District tinah polling official zinga naupang zual hlangin an enkawl PS pakhat tal siam tum a ni.

18. Critical PS tin leh PS awm zawng zawng zatve aia tlem loah webcasting tih tum a ni.

19. ECI thuchhuak angin, inthlan hma ní leh inthlan ní-ahte Election-a thawktu official leh security mi, damlohna vanga hmanhmawh taka damdawi-in panpui ngai an awm palha phurh nan air ambulance ruahman a ni dawn.