Assembly budget session a ṭiak ta; 2024-25 Mizoram budget pawm a ni

Kum 2024-25 Mizoram budget (estimate) Rs 1,44,12,12,13,000 (vbc. 14,412.12) chu March 13, Nilaini zan khan Assembly House-ah pass a ni a, budget pass tâk hman phalna tur bill, The Mizoram Appropriation Demand for Grants 2024-2025 Bill, 2024 pawh pawm nghal a ni bawk.

2024-25 Mizoram budget estimate pumpuiah hian Assembly House-in a pass bik (voted) chu Rs 1,31,76,85,35,000 a ni a; cheng vbc. 12,35,26,78,000 erawh chu House-in a pass ngai lo, charged a ni thung.

Mizoram Legislative Assem­bly pakuana ṭhut­khawm vawi hnihna, budget session ni nghal hi February 19, 2024 khan ṭan a ni a, ni 24 awhin, ni/vawi 16 chhung ṭhut­khawm a ni a, March 13, Nilaini zan dar 9:45 vel khan tiam chin awm loa tihtawp a ni.

Tun ṭum budget session-ah hian House-a chhan tur zawhna (starred question) 482 a lut a, 475 pawm niin, pali hnâwl a ni a, pathum chu a thehluttute'n an hnûk kîr leh.

Starred question zinga 280 chu List of Business-ah dah a ni a, House-ah 75 chhàn hman niin, chhan hman loh 205 a awm. Starred question zinga 194 chu unstarred question (ziaka chhan chi)-ah leh a ni a; unstarred question lut zat chu 37 niin, pawm vek a ni.

Budget session chhungin private member resolution pahnih pawm a ni a; member thi KL Lianchia sûnna hun hman a ni. India vice president Jagdeep Dhankhar chuan February 26 khan House-ah thu a sawi a; HSLC Examination zawhna chungchangah School Education minister Dr Vanlalthlana'n House-ah statement a siam bawk.